Туксанда да тормыш ямьле

Ул юбилярга иң изге теләкләрен җиткерде. Тантана сәбәпчесен социаль яклау бүлегенең консультанты Валентина Фадеева да котлады: ул юбилярга бүләк тапшырды. Матур, ачык йөзле, елмаеп кына торучан Әлфия апага һич туксан яшь биреп булмый. Ә бит аның тормышы сугыш чоры мохтаҗлыклары белән бәйләнгән авырлык­лар белән тулы, әтисен кулга алу йөрәгенә авыр яра салган. Аны халык дош­маны дип игълан иткәндә, мәкаләбез герое колхоз канцеляриясендә эшләгән була. Әлбәттә, икенче көнне үк аны авыр эшләр башкаруга күчерәләр. Өстәвенә, колхоз аны торф эшләренә һәм урман кисәргә җибәрә. Кыскасы, яшьтән нужа күрергә туры килә аңа. Ел буена кыз чит җирләрдә эләктереп кайткан бизгәктән интегә. Бәла аны даими рәвештә эзәрлекләгән кебек була. Шул ук вакытта укуын тәмамлап, һөнәр аласы килә. Бирск педагогия институтына укырга керә. Әмма бирегә дә "кара сакалы" үзе белән ияреп килә: институтта укырга мөмкинлек бирмиләр. Яфаева, озак уйлап тормыйча, Уфа сәүдә-кооперация техникумына документлар тапшыра, аны ул бары тик бишле билгеләренә генә тәмамлый. Аннары Башкортстанның Гафури районы Красноусольский бистәсендә билгеләнеш буенча эшли һәм Урыссу кулланучылар берләшмәсендә икътисадчы сыйфатында озак вакыт дәвамында хезмәт куя.

Аның турында тулысынча бәхетле кеше дип әйтергә була. Кызы һәм улы - дәрәҗәле кешеләр, фән кандидатлары. Зурайган оныклар һәм оныкчык­лар әбиләренең йөзен кызартмый. Мәкаләбез герое күп балалы гаиләдә үсә. Унбер баланың тугызының бүгенге көндә исән булуы да гаиләнең авырлыкларны җиңә торган яхшы генетикасы турында сөйли.