Ютазыда кечкенә төпчектән зур янгын чыккан

Ютазы районы күзәтчелек эшчәнлеге бүлеге начальнигы, эчке хезмәт подполковнигы Марат Харисов мәгълүматы буенча, шундый соңгы янгын 17 май көнне Ютазы авылы Мәктәп урамы буенча шәхси йортларның берсендә чыккан. Беркайда да эшләмәүче утыз җиде яшьлек йорт хуҗабикәсе еш кына өендә шешәдәшләре белән бергә спиртлы эчемлекләр куллана. Шундый "мәҗлес"тән соң алар табигать кочагына чыгарга була. Кемнеңдер саксыз ыргыткан тәмәке төпчеге аркасында йорт тамбурында янгын чыга, моның нәтиҗәсендә тамбур үзе һәм өйнең түбәсе яна. Янмыйча калган бүлмәләрне караучылар идәндә күп санлы тәмәке төпчекләренә тап булалар.