Районда тагын бер соцобъект ачылды

Күркәм яңа фельдшер-акушерлык пункты озак еллар торган кебек - аның алдында чәчәкләр түтәле бар, агач үсә. Димтамак авыл җирлеге башлыгы Марс Ямалиев үзенең чыгышында, модульле ФАПны монтажлауның бары берничә көнгә генә сузылуына ышануы кыен, дип билгеләп үтте. Ул район, тулаем республика җитәкчелегенә, шулай ук алабакүллеләрнең үзләренә, объектны урнаштыруда ярдәм иткәннәре өчен рәхмәт белдерде. Ул шулай ук әлеге эштә актив ярдәм иткән алабакүлле Айдар Гәрәевка рәхмәт хаты тапшырды. Үзәк район хастаханәсе баш табибының рәхмәт хаты белән эшләрендә ярдәм күрсәткәне өчен Алабакүл кирпеч заводы коллективы да бүләкләнде. Аны завод вәкиле Илшат Камалдинов кабул итеп алды: хатны Урыссу үзәк район хастаханәсе баш табибы урынбасары Людмила Гаделшина тапшырды. Әлеге социаль әһәмияттәге объект ачылу белән Алабакүлдә яшәүчеләрне район башлыгы урынбасары Зәрия Рәшитова һәм башкарма комитет җитәкчесенең социаль мәсьәләләр буенча урынбасары Гөлдания Белалова котладылар.

- Бүгенге чара районның хыяллар белән генә түгел, реаль эшләр белән яшәвенә дәлил, - дип билгеләп үтте үзенең чыгышында Рәшитова. - ФАП озак еллар дәвамында сезгә игелек белән хезмәт итсен. Шулай да күпчелектә бирегә профилактика максатларында гына йөрергә кирәк. Тантана символикасын - ал тасманы кискәннән соң, теләүчеләр бина эченә үтә алды.

Фельдшер-акушерлык пункты тулысынча кирәкле җиһаз белән тәэмин ителгән. Медикаментлар өчен суыткыч һәм шкафлар, манипуляцион өстәлләр, һаваны зарарсызландыру өчен бактерицид лампа, гинекологик кушетка, буй үлчәү җайланмасы, электрон үлчәү, янгын сигнализациясе һәм янгын сүндергечләр, фельдшер өчен гардероб, раковиналар, санузел - боларның барысы да пункт комплектациясенә керә. Фельдшер Илдар Әпсәләмов беренче пациентларны бүген үк кабул итте: бер хатын-кызның кан басымын үлчәде, ә ике мәктәп укучысы җәйге каникуллар чорында күпмегә үсүләрен белергә теләделәр. Шуны искәртәбез, модульле ФАПларны кую республиканың сәламәтлек саклау учреждениеләрен модернизацияләү программасы буенча тормышка ашырыла.

Сүз уңаеннан, узган елда мондый объект Акбаш авылында куелды. Киләчәктә модульле ФАПны Алма-Ата торак пунктында ачу планлаштырыла.