Югалганнар, ләкин онытылмаганнар…

Киләчәк буыннар мәнфәгатендә авыллар турындагы хатирәләрне саклап калырга ярдәм итәргә сәләтлебез. Әгәр бу хакта хәзер кайгыртмасак, киләчәктә югалтканны кире кайтару бөтенләй мөмкин булмаячак. Нәкъ менә шуңа күрә дә туган төбәкләрдә җылылык һәм якты истәлекләр белән тулы очрашулар оештырыла да инде. Кәрәкәшле җирлеге хатын-кызлар оешмасы «Юкка чыккан авыллар эзләре буенча» программасы кысаларында эшли. Шундый авылларның берсе — «Кызыл Таң», аңа нигез 1925 елда салынган. Беренчеләрдән булып бирегә Мөбәрәкша Ситдыйков, Габдрәшит Латыйпов, Зәкәрия Гәрәевлар күчеп килгәннәр. Бу авылны соңгылардан булып 1980 елда Мәхәсим Сөләйманов ташлап китә. Авыл тарихын саклап калу һәм аның истәлеген мәңгеләштерү максатында калкулыкта истәлекле таш куелган. Халык еш кына әлеге урынга килә — кайчандыр авыл урнашкан җирдә туганнарының һәм якыннарының каберлекләрен җыештыра. Кәрәкәшле җирлеге хатын-кызлар оешмасы әгъзалары бик теләп элеккеге авылдашлар белән аралашалар һәм истәлекле очрашулар оештырырга булышалар.

Монда кайткан арада, беренчеләрдән килеп урнашучыларның дәвамчылары әйтерсең лә үткән заман сулышын тоя, йөрәкләре ата-бабалар өчен горурлык хисе белән тула. Бу очрашулар буыннан-буынга тапшырыла килә торган күркәм гореф-гадәткә әверелгән.

Ерактан күренеп торган урынга куелган истәлекле таш мәңгелек хәтер символын гәүдәләндерә. Анда авылга нигез салучылар һәм төбәкне үстерүгә бар булмышларын биргән якташлар исемнәре уеп теркәлгән. Аларның дәвамчылары монда гаиләләрендә ядкарь булып сакланган фотосурәтләр һәм элек-электән калган төрле әйберләр алып килә. Бу әйберләр үз чиратында «Кызыл таң» авылы тормышы һәм көнкүреше турында сөйләгән, җирле энтузиастлар җыйган коллекцияне тулыландыра.

Һәр очрашу үзенчәлекле тарихи бәйрәмгә әверелә. Мондый төр чараларда борынгы җырлар, биюләр башкарыла, халык йолалары яңадан торгызыла. Балалар, яшьләр һәм өлкәннәр, ата-бабалары мирасын саклауның мөһимлеген аңлап, бу чараларда зур кызыксыну, теләк белән катнашалар. Кәрәкәшле җирлеге хатын-кызлар оешмасы мондый бәйрәмнәрне оештыруда гаять зур роль уйный, буыннар арасындагы элемтәне саклап калырга ярдәм итә.

Гөлфирә Мөхетдинова,
Кәрәкәшле хатын-кызлар оешмасы рәисе