Ютазы район балалар думасы депутатлары үз сафларына яңа укучылар кабул итте

Район башлыгы Рөстәм Нуриевның ике яклы ачык диалог формасында узган яңа чакырылыш Балалар район думасы депутатлары белән очрашуында думаның үз эше буенча гына түгел, район масштабындагы проблемаларны хәл итү буенча да күп кенә конструктив тәкъдимнәр яңгырады.

Башта яшь депутатлар район башлыгын башкарылган эшләр белән таныштырды. Җәй башыннан алар берничә бәйрәм чарасын һәм хәйрия акциясен оештыруда катнашырга өлгергән, бәйрәм даталарына видеороликлар чыгарган, төрле конкурслар оештырган. Киләчәктә алар интернат-мәктәп укучылары һәм инвалид балалар өчен чаралар уздыруны, волонтерлык эшендә катнашуны, балалар мәйданчыкларына шефлык итүне, Студентлар көнен уздыруны планлаштыра.

Башкарылган эш турында отчеттан соң, яшь депутатлар үз сафларына яңа әгъзалар һәм Балалар район думасы депутаты кодексы кабул итте, һәм анда эшләүне ничек күзаллауларын бәян итте. Депутатларның күбесе карт кешеләргә һәм инвалид балаларга ярдәм итәргә тели, КВНчыларның мәктәп клубларын оештыру теләкләре дә бар. Яшь булуларына кармастан, думалыларны торак пунктларны төзекләндерү һәм фатирларны альтернатив җылылык белән тәэмин итү чыганакларына күчерү кебек өлкәннәр сораулары да кызыксындырды. Нуриев үз әңгәмәдәшләренә аларның аерым мәнфәгатьләренә һәм сорауларына җавап бирерлек инфраструктура булдырырга ярдәм иткән бистәне күзаллау проектларын булдырырга тәкъдим итте. Район башлыгының тагын бер тәкъдиме иске бистә видеоролигын һәм слайдларын эшләүгә кагылды.

- Сезнең нәрсә дә булса үзгәртергә тырышуыгыз башкарылган эшләрегездә чагылырга тиеш. Сезне аерым гамәлләрегез, хезмәтегез буенча таныячаклар, - дип аңлатты ул яшь депутатларга, шуның белән ял турында да онытырга кирәкмәвен дә билгеләп узды.