Гөлназ Сәфәрова үзе яратып эчә торган чәй рецептлары белән бүлешә

1. Лимон, имбирь һәм корицалы чәй. Бу чәй иммунитетны күтәрә.

Чәйнектә кара чәйне пешерегез, 2 чәй кашыгы вак итеп туралган имбирь, дарчин (корица) таягы салыгыз. 10 минут төнәткәннән соң лимон өстәгез. Теләгән кеше шикәр комы да сала ала.
2. Әфлисун һәм бөтнек чәе.

Яшел яки кара чәйне чәйнеккә салыгыз, әфлисун кабыгын турап өстәгез. 10-15 яфрак бөтнек кушыгыз. 10 минут төнәтегез. Әзер булгач әфлисунны телемләп салсагыз да була.

3. Карлыган яфрагыннан чәй.

Кайнар су өстенә кара яки яшел чәй салыгыз. 5-7 кипкән яки туңдыргычта катырылган карлыган яфрагы өстәгез. Тагын өстеннән кайнар су белән пешереп алыгыз. 5-7 минут төнәтергә кирәк.

4. Ясминлы чәй.

1:5 порция белән ясмин һәм чәйне болгатабыз. Өстенә кайнар су салып пешекләгәч, суны түгәбез. Яңадан кайнар су агызабыз. Монда 1 чынаякка 1 бал кашыгы ясминлы катнашма булырга тиеш. 5 минут төнәтәбез.

5. Салкын сырганак (облепиха) чәе.

Сырганакны һәм бөтнек яфракларын кайнар суга салабыз, 10-15 минут тотабыз. Яфракларны җыеп алып бал кушабыз. Әлегә чәй салкын килеш тә бик тәмле, балаларга компот кебек.

Иң кызыклы язмалар - Интертат Telegram-каналында