«Олимп» спорт комплексы капиталь ремонтка ябылды

15 гыйнварда "Олимп" спорт комплексы капиталь ремонтка ябылды. Объект, спорт комплексы буларак, 2005 елдан бирле эшли. Республика бюджетыннан бүлеп бирелгән акчалар ярдәмендә, шушы көннәрдә ремонт эшенә керешәчәкләр. Секцияләр һәм спорт түгәрәкләре «Энергия» стадионында һәм гомуми белем бирү мәктәпләренең спорт залларында үз эшләрен дәвам итәчәк.

Башкарма комитет җитәкчесе Светлана Самонина сүзләренчә, «Олимп» спорт комплексының киң кулланылыштагы объектларының берсе – бассейн, ул шулай ук төзекләндереләчәк. Бассейн тулысынча ремонтланачак һәм камил, тиешле торышка китереләчәк.

- Шулай ук спорт комплексының түбәсен җылыту буенча эшләр башкару күздә тотыла. Бу бина эчендәге температураны шактый яхшыртырга мөмкинлек бирәчәк. Без балалар өчен уңайлы шартлар булдырырга омтылабыз, алар хәтта елның иң салкын фасылында да спорт белән шөгыльләнә һәм үз формаларын саклый алачак, – дип билгеләп үтте Светлана Петровна.

Моннан тыш, капиталь ремонт барышында спорт комплексының тәрәзәләре алыштырылачак. Яңа тәрәзә конструкцияләре җылылыкны саклауда аеруча мөһим булачак, бу исә җылылык югалтуны шактый киметергә ярдәм итәчәк, спорт комплексындагы мохитне тагын да уңайлырак итәчәк.

Капиталь ремонт эшләре шулай ук спорт комплексында инженерлык челтәрләрен яңартуны үз эченә ала. Боларның барысы да комплекстагы барлык системаларның ышанычлы һәм нәтиҗәле эшләвен тәэмин итү өчен башкарыла.

Кызганычка, мондый эшләр билгеле бер вакыт таләп итә һәм без шуны аңларга тиеш: спорт комплексына керү мөмкинлеге булмау, әлбәттә, сезнең күбегез өчен уңайсызлык тудыра. Әмма ремонт нәтиҗәләре һәрберебезнең өметен тулысынча аклар, дип ышанабыз. Без «Олимп»ны актив яшәү рәвеше алып баручы һәм саулыкларын кадерләүче һәркем өчен тагын да яхшырак, уңайлырак һәм заманчарак итәргә тырышабыз.

Барыбыз да күнегүләрне "Энергия" стадионында һәм мәктәпләрнең спорт залларында уздыруның вакытлыча уңайсызлык икәнен яхшы аңлый. Әмма бу елның август азагында ук барлык спорт сөючеләр өчен яңартылган «Олимп» үз ишекләрен ачар, дип ышанабыз.

Спортчылар өчен күнегүләр билгеләнгән расписание буенча оештырылачак.