Сайлаган һөнәренә тугрылык саклап

Фәнүзә Ибраһимова

Автор фотосы

Укытучы элек-электән безнең илдә иң дәрәҗәле һөнәрләрнең берсе булып саналган. Шулай итеп, укытучылар балаларга белем биреп кенә калмый, аларны тәрбияләп тә, һәрьяклап үстерә дә. Халык әйтмешли, яхшы укытучыны китап йөге дә алыштыра алмый. Һәр кешенең яраткан укытучысы һәм остазы була, ул гомере буе аны җылы хисләр белән искә ала, шуңа күрә 5 октябрь көнне билгеләп үтелә торган Укытучылар көнендә үз мөгаллимнәрен аларның хәзерге укучылары гына түгел, мәктәпне тәмамлаучылар да котлый, аларга чәчәк бәйләмнәре бүләк итә,  шигырьләр багышлый. Зур шәһәрләрдә генә түгел, кече авылларда да бу җиңел булмаган һөнәр ияләре укытучы исеменә тугры кала. Безнең районда шундыйларның берсе - Красновлар династиясе.

Династиягә нигез салучы булып күрше Баулы районында туып-үскән гаилә башлыгы Николай Петрович Краснов тора. Узган гасырның җитмешенче еллары башында, Әлмәт физкультура техникумын тәмамлаганнан соң, ул район халык мәгарифе бүлеге юлламасы буенча Подгорный мәктәбенә килә, аннан туган авылыннан яшь хатынын да алып кайта. Мәктәптә ул физкультура дәресләреннән генә түгел, хезмәт дәресләреннән дә белем бирә.  Подгорный мәктәбендә Николай Петрович, лаеклы ялга киткәнче, утыз сигез ел эшләгән.

Туган мәктәбендә әтисе эшен аның улы Александр Николаевич Краснов дәвам итә. 2001 елда, Бөгелмә индустриаль-педагогика техникумын тәмамлаганнан соң, күпмедер вакыт ул әтисе урынына Подгорный мәктәбендә эшли, аннары 1 санлы Урыссу мәктәбендә шул ук фәннәрне укыта. Ә әтисе лаеклы ялга чыккач, Александр Николаевич аның эшен туган мәктәбендә дәвам итә. Хәзер, икенче уку сезоны инде  ул аның директоры да булып тора.

Династиягә нигез салучының кызы Вера Николаевна Новикова шулай ук педагогика тармагын сайлый, ләкин башка юнәлеш буенча. Ул рус теле һәм әдәбияты белгечлеге буенча Алабуга дәүләт педагогия институтын тәмамлаган. Вера Николаевна әлеге фәннәрне чирек гасыр чамасы туган мәктәбендә укыта һәм бары тик быелгы уку елыннан башлап кына, белем йортын башлангыч статуска күчергәч, Урыссу гимназиясендә эшли башлый. Укытучының уңышлары Татарстан Республикасы Мәгариф һәм фән министрлыгының Мактау грамотасы белән билгеләнә ә быел ул Татарстан Республикасының «Мәгарифтәге казанышлары өчен» күкрәк билгесе белән бүләкләнде.