Татарстан буенча Роскомнадзор идарәсен Оксана Шевченко җитәкләде

Бу турыда ведомство сайтында хәбәр ителә. Оксана Шевченко Украина ССРның Донецк өлкәсенең Комсомольское шәһәрендә (хәзер Донецк халык республикасы) туган. 1991 елдан 1999 елга кадәр мәгариф өлкәсендә эшләгән. 2001 елда Төмән дәүләт университетын тәмамлаган, 2004 елда Урал дәүләт хезмәте академиясендә яңадан әзерлек узган.

2000 елдан күзәтчелек һәм контроль органнарында эшли. 2000 елдан 2008 елга кадәр Көнбатыш Себер Россвязьохранкультура идарәсендә хезмәт иткән.

Ведомство үзгәртеп корылганнан соң, 2008 елдан 2011 елга кадәр Төмән өлкәсе, Ханты-Манси автоном округы – Югра һәм Ямал-Ненец автоном округы буенча Роскомнадзор идарәсендә бүлек начальнигы булып эшләгән.

2011 елның августында Төмән өлкәсе, Ханты-Манси автоном округы – Югра һәм Ямал-Ненец автоном округы буенча Роскомнадзор идарәсе җитәкчесе урынбасары итеп билгеләнгән.

2015 ел башыннан 2016 ел башына кадәр – Төмән өлкәсе, ХМАО һәм ЯНАО буенча идарә җитәкчесе вазыйфасын башкаручы, 2016 ел башыннан – аның җитәкчесе.

Татарстанда шундый ук структура башлыгы вазыйфасына Россия Санлы үсеш министрлыгының 2026 елның 12 гыйнварындагы боерыгы белән билгеләнгән. Яңа эш урынында үз вазыйфаларын башкаруга 14 гыйнвардан керешкән.

2024 ел ахырыннан Татарстан буенча Роскомнадзор җитәкчесе урыны буш калып килде. Ул вакытта Федераль куркынычсызлык хезмәтенең элеккеге офицеры, 2023 елдан идарәне җитәкләгән Юрий Никитин үз вазыйфасыннан киткән иде.

https://dzen.ru/a/aXTMnxD7VhuwU5XF?utm_source=yxnews&utm_medium=desktop