Урыссу бистәсе ишек алларында яңа уен элементлары барлыкка килде. Кая безнең уен мәйданчыгы?

Без яши торган Горький урамындагы 1 санлы йорт "Идарә итүче компания" балансында тора. Тимерне кызуында сугарга кирәк. Форсаттан файдаланып, җыелыш бетү белән дә аның директоры Закуан Ильясовка безнең йорт территориясенә уен элементлары куелачакмы дип мөрәҗәгать иттем.

- Быел иске таганнарны, һичшиксез, алмаштырачакбыз. Өстәвенә, бездә район прокуроры күрсәтмәсе дә бар, - дип ул анык итеп җавап кайтарды.

Җәй тәмамлануга таба йөз тотты. Безнең уен мәйданчыгында бернинди дә хәрәкәт юк - вәгъдә ителгән яңа элементлар күренми... Балалар шул ук иске тимер таганнарны көч-хәл белән селкетеп, атынырга тырыша. Әлеге уен мәйданчыгының икенче елын инде хәтта буяулары да яңартылмый...