Урыссу халкы - Республика бәйрәмендә

Район мәдәният йорты алды мәйданчыгына сәүдә белән килгән фермерлар, шәхси ярдәмче хуҗалык ияләре урыссулыларга ит, сөт, эремчек, яңа суелган кош түшкәләре, бәрәңге, кишер һәм җиләк-җимеш тәкъдим итте. Балалар сәнгать үзәге коллективы кул эшләре белән сату итте. Шактый суык көнгә җылы өреп, тирә-якка тәмле шашлык исе таралды. Ә район мәдәният йорты солистлары, иҗат коллективлары һәркемгә бәйрәм кәефе өләште. Әлбәттә, бәйрәмгә җыелган кеше артык күп булмады – һава торышы күпләрне бу көннәрдә өйдә утырырга мәҗбүр итә. Шулай да үзләрендә теләк табып мәйданга килгән кешеләр тәм-том да алды, артистларның дәртле җырларына кушылып, суык йөгерә башлаган сөякләрен язып, биергә дә чыкты.

Ильмира ГАЛИЕВА

Автор фотолары