Ютазы районында терлек азыгы хәзерләү акрын бара

Бүгенге көндә бары тик “АгроМир”, “Тукай исемендәге һәм “Ансель Вафауллин” агроколлективлары гына сенаж сала. Калган хуҗалыкларда сусыл азык хәзерләүгә керешүне артык сузалар. Күпчелек урында төп сәбәп техника төзек булмау белән бәйле.

Аграрчылар Тукай исемендәге җәмгыять механизаторлары сенаж сала торган кырда да булды. Алар теземнәрдә ята торган күпьеллык үләннең дымлылыгын тикшерделәр. Теземнәр артык калын булу сәбәпле, үләннәр тиз кибә алмый. Нәтиҗәдә бу сенаж сыйфатында нык чагылыш таба. Шуңа күрә хуҗалык җитәкчелегенә үлән уру технологиясен яңадан карарга киңәш ителде

Авыл хуҗалыгы тармагы җитәкчеләре башка темаларга да сөйләште. Бүген терлек азыгы хәзерләү белән беррәттән авыл эшчәннәре алдында чиста парларны эшкәртү, яфрак аша игеннәрне тукландыру, ашлык комбайннарын ремонтлау бурычлары тора. Сүз уңаеннан, июль аеның беренче ун көнлегендә ашлык комбайннарын кабул итеп, районда республика комиссиясе эшләячәк. Ә бу исә уракка кереп китәргә дә күп вакыт калмый дигән сүз.

Илмира ГАЛИЕВА, автор фотолары