Ютазы районында ягу сезоны башланды

Район башкарма комитетының инфраструктура үсеше бүлегеннән бирелгән мәгълүматларга караганда, булган 37 котельныйның 22се эшли башлаган. Беренче эш итеп, район мәгариф учреждениеләре - 14 мәктәп һәм 19 балалар бакчасын җылылык системасына тоташтырылды, дип хәбәр итте башкарма комитеты җитәкчесенең инфраструктура үсеше буенча урынбасары Илгиз Мортазин.

- Балалар өшергә өлгермәде. Ә хәзер, торбаларга җылы килгәч, группа бүләмәләрендә тагын да рәхәт, - дип белдерде Урыссуның 2 санлы балалар бакчасы тәрбиячеләре.

Сәламәтлек саклау объекталарына да җылы бирелә башлады.

- Безнең район хастаханәсе бүлекләре атна башында ук берьюлы җылынды. Шәхсән бөтен бүлекләр буенча йөреп чыктым. Палаталар җылы, авырулар канәгать. Моңа кадәр суык булу сәбәпле, балалар бүлегендәге кечкенә авыруларны әти-әниләргә күбрәк өйдәге шартларда дәваларга киңәш иткән булсак, хәзер алар стационарда дәвалана ала, - дип хәбәр итте районның баш табибы Светлана Шакирова.

Чиратта - мәдәният, спорт һәм башка социаль учреждениеләр.

Бүгенге көндә бистәдә ике контурлы казан урнаштырасы калган 76 фатирның иллесендә милекчеләр үзләре мөстәкыйль рәвештә шәхси җылыту системасына тоташты, калганнары белән шөгыльләнү дәвам итә.