Ютазы йолдызчыклары биеп остара

26 гыйнварда Ютазы йолдызчыклары Уфа шәһәрендә узган "Талант канатларында" Халыкара бәйге-фестивальдә катнашты. Конгресс-холл үзәгендә чыгыш тоткан иҗат коллективының "Серпантин" төркеме I дәрәҗә дипломанты булды. Ахырда кызлар һәм малайлар Башкортстан башкаласының күренекле урыннарында булырга да өлгергән.

Икенче көнне Ютазы йолдызчыклары Яр Чаллы шәһәренә карап юл алды. Алар биредә "Энҗе бөртеге" хореография сәнгате солистларының өлкәара бәйгесендә катнашты. "Тыпырдап бию"гә чыккан Ралина Нигъмәтуллина, Влада Салихова, Минзилә Нурлыгаянова, Амалия Хәйретдинова I дәрәҗә лауреаты булса, "Испания ритмнары"н биеп, алар III дәрәҗә лауреаты булды. Кызлар дипломнар, медальләр һәм кубоклар белән бүләкләнде, дип хәбәр итте ансамбльнең җитәкчесе Минзилә Абдурахманова.