Печән чабалар, суктыралар, туфрак эшкәртәләр…    

Бүгенге көндә Тукай исемендәге, Ансель Вафауллин һәм «Уңыш» хуҗалыклары уракка кереште. 
«Уңыш» җәмгыятендә борчак суктыруга Илнар Хәлилов һәм Илмир Мәрданшин идарә иткән ике «Акрос» комбайны җәлеп ителгән. 
- 105 гектар борчакны өч көн эчендә чабып бетердек, - ди коллектив җитәкчесе Айнур Әхмәдиев. – Бүген (2 август киченә – автор искәрмәсе) 70 гектар мәйданда борчак җыеп алынды. Бер үк вакытта 420 гектар мәйданны биләгән көзге бодайны чабу бара, хәзерге вакытта Каклыкүл авылы янында 150 гектар чабылды. Шушы көннәрдә аны суктыруга керешәбез. 15 августта уҗым чәчүгә керешергә планлаштырабыз. Аннары сабан культураларын урып-җыюны башлыйбыз. 
Иксез-чиксез кырда - ике дала корабы «йөзә”. КамАЗ машиналарына комбайн бункерларыннан борчак «дулкыны ага”. Шулай итеп, туган җир амбарлары яңа уңыш кабул итүгә кереште.