Ютазы районы агроколлектив җитәкчеләре чәчү кампаниясенең эш планнарын яклады

Авыл хуҗалыгы җитәкчеләре чыгыш тотканда, бер генә юнәлеш тә күз уңыннан төшеп калмады - техника күләме һәм аның хәзерлеге, чәчү структурасы, орлык фонды, ашлама... Соңгысына аеруча зур игътибар бирелде. Быел республика Хөкүмәте аграрчы алдына һәр гектар сөрүлеккә 65 килограмм тәэсир итү көченә ия матдә хисабыннан да ким булмаган минераль ашлама кертү бурычын куйды, дип ассызыклаган министр урынбасары, агроколлективларның никадәр туфракка өстәмә сый бирә алулары белән ныклап кызыксынды. Хуҗалыкларның банк кредитлары белән эшләү мөмкинлекләре дә көн кадагында торды. Ашлаган җир генә аш бирә - җыелышта яңгыраган төп фикер булды. Чарада район башлыгы Рөстәм Нуриев, район советы депутаты Сәгадәтулла Төхбәтуллин катнашты.