Урыссулы Мәрзия Ахунова үзенең 85 яшьлек юбилеен билгеләп узды

Данлы гомер юбилеен ул Бөек Ватан сугышы ветераннарын торак белән тәэмин итү программасы кысаларында алынган уңайлы, якты фатирда каршылый, ул - Бөек Ватан сугышында катнашучының тол хатыны.

- Кара көнгә акча җыйдым, - дип елмая юбиляр. - Әмма яңа фатир алганнан соң, иске җиһазны күчерәсем килмәде. Бөтен әйберем яңа, кер юу машинасын гына алып килдем. Шулай итеп, әҗәлне көттереп торырмын инде. Аның кайгысы юк - акча бетте, матурлыкта да яшәп каласы килә.

Үз гомерендә күпне кичергән апа өчен мондый язмыш бүләге - чынлап та зур куаныч. Ул моңа лаек. Балачагыннан Мәрзия Галәветдин кызы күп югалтулар кичергән - сугыш башлану белән аның әтисен хезмәт армиясенә алганнар. Тиздән ул сугыштан бөтенләй бетеренеп, бернинди хезмәткә дә ярарлык булмаган хәлдә кайта. Аның хатынына һәм биш баласына гаилә башлыгы ярдәменнән башка тормышка юл салырга туры килә. Башкортстанның Туймазы районы Япрык авылында туып үскән Мәрзия мәктәп укучысы яшендә чагыннан ук колхоз тормышына җигелә. Әйтик, мәктәптә дәресләр тәмамлангач, кызлар әйләнеп йөрүче ат белән хәрәкәткә китерелгән молотилкада эшләү өчен төнге сменага бара торган булалар. Мондый авыл хуҗалыгы техникасы ярдәмендә бодай башакларыннан аерыла. Тузан баганасы күз ачарга да мөмкинлек бирми. Өйләренә таң алдыннан хәлсезләнеп кайталар. Соңыннан Ахунованы урман кисәргә дә җибәрәләр. Ансыз була ди мени. Анда даими ачлык хисе. Һәм гел өшеп кенә тору халәте. Киеме тәнен җылытмый, ашаган ризыгы организмына көч бирми. Бердәнбер шатлыгы - өйгә кайту турында уйлары. Урман кисү, хезмәт армиясе, ФЗУ, колхоз, "артык булган" авыл хуҗалыгы продуктларына - йомыркага, сөткә, иткә, йонга салымнар... Әлеге саналган әйберләр кәефне күтәрми. Ирексезлектә коллар хезмәте башкару да авыр.

Шуңа күрә Урыссуга күченү, ә бу инде кияүгә чыкканнан соң була, күпмедер дәрәҗәдә җиңеллек алып килә. Әлбәттә, барыбер шулай ук күп тырыша, дүрт баланы аякка бастыра. Мәрзия апа 11 ел дәвамында Урыссу бемит заводында эшли, соңыннан "Электросоединитель" заводында хезмәт куя. Пенсиягә дә соңгысыннан чыга. Юбилее көнендә өч бала анасын (кызганыч, ул бер улын җирләгән инде), алты оныкның һәм өч оныкчыкның әбисен район советы аппараты җитәкчесе Гүзәлия Фәхертдинова, район ветераннар советы рәисе Зоя Глушкова һәм "Электросоединитель" заводының профсоюз комитеты рәисе Рафаэль Зарипов гомер бәйрәме белән тәбрикләделәр. Алар тантана сәбәпчесенә җылы теләкләрен юллады, чәчәкләр һәм бүләкләр тапшырды.