Урыссуда зур бәйрәм концерты узды

Билгеле булуынча, яз - ул өмет-хыяллар чоры. Язгы чорда ир-егетләрнең джентельменнар булуын, чәчәкләр һәм комплиментлар бүләк итүләрен телисе килә. Шуны билгеләп үтәргә кирәк, район мәдәният йорты артистлары әлеге бурычны бик шәп үтәде.

Тамаша залында гүзәл хатын-кыз райондашларыбыз җыелган иде, ә сәхнә артында талантлы җырчылар, биючеләр һәм алып баручылар үз чыгышларын түземсезлек белән көтте. Ут сүнде һәм залда бәйрәм тамашасы башланды. Район башлыгы тарафыннан җиткерелгән җылы теләкләр залда утырган барлык туташ-ханымнарның күңеленә хуш килде. Рөстәм Нуриев гүзәл затларның тормыш юлдашларын батырлыкка илһамландыруларын һәм җәмгыятьтә дә әһәмиятле роль уйнауларын ассызыклады. Үзенең котлавын йомгаклап, Нуриев безнең район оешуының юбилей датасын символлаштырган егерме биш яшьлек кызларга чәчәк бәйләмнәре бүләк итте.

Ә чараның тантаналы өлешеннән соң, тантана сәбәпчеләрен "Ютазы йолдызлары" халык бию ансамбле, район мәдәният йорты солистлары Кристина Бородич, Тимур Синәгулулов, Рим Нәфыйков, тормыш иптәше Айгөл белән Зирәк Миңнуллин, Рамил Абдурахманов, Әлфия Батршина һәм Николай Гребенюк составындагы соклангыч дуэт һәм "Кичке җыр" вокаль ансамбле чыгышлары куандырды.

Концерт ахырында галант яшь кешеләр гүзәл затларга лалә чәчәкләре бүләк итте, мәдәният цехы осталары - ир-егетләр исә финал җырда туташ-ханымнар белән соклануларын белдерде.

Шуны икеләнмичә расларга була: әлеге чара менә дигән язгы сюрприз булды һәм тамашачыларның күңелләрен бәйрәм кәефе белән тутырды.