Үз гомерләрен куркыныч астына куеп, волонтерлар махсус хәрби операция зонасына гуманитар ярдәм илтә

«ТылСВО» төбәк волонтер төркеме оештыручысы һәм җитәкчесе Ринат Нуриев, ютазылы Марс Ямалиев белән берлектә, хәрбиләргә чираттагы гуманитар ярдәм күрсәтү максатында, янә катлаулы юл үтте. Якташлар машинасында иң кирәклесе һәм мөһиме: туганнардан шәхси посылкалар, техника, запас частьләр һәм башка бик күп йөкләр тупланган иде. Һәр мондый сәфәр (ә бу исәп буенча 24 нчесе иде) Ютазы, Баулы, Туймазы районнары, Октябрьский шәһәре һәм Оренбург өлкәсе Төньяк бистәсе халкының шәфкатьлеге нәтиҗәсе ул. 
Ринат Нуриев һәм Марс Ямалиев белән без редакциядә очраштык. Ринат — Әфганстандагы сугыш хәрәкәтләре ветераны, әфганчылар рәисе, озын буйлы, тыныч холыклы һәм хәрбиләрчә сабыр. Марс — Димтамактан, бик ачык, киң күңелле кеше. Икесе дә олы хезмәт юлы үткән, тәҗрибәле ир асыллары, аларның инде балалары гына түгел, оныклары да үсеп килә. Дуслыклары ТИСБИда укыган чорда башланган.
— Һәр сәфәр үзенчәлекле, — ди Ринат Нуриев. — Шулай да булгалый, бер ноктага юлланабыз, ә аннары борылабыз да икенчесенә барабыз, чөнки безнең егетләр башка җиргә күченгән булып чыга. Әмма теләсә нинди шартларда да үз бурычыбызны үтибез — барлык кирәкле әйберләр адресатларга төгәл барып җитә. Бүтән волонтер төркемнәре белән актив хезмәттәшлек итәбез, мәсәлән, «Лучи добра», «Җылы йөрәкләр», «По зову сердца» һәм башкалар. Посылкалар белән алмашабыз, кемгә нәрсә кирәк, тапшырабыз.
Гуманитар йөкләрне ташуда баулылы Ринат Нуриев 2023 елдан бирле катнаша. Ә барысы да шәхси үтенечтән, бер телефон шалтыратуыннан башланган. 
— Күп еллар гаиләләр белән аралашкан дустыбызның хатыны шалтыратты һәм: «Ринат, син иремә кайбер әйберләрне илтә алмас идеңме?», дип сорады. Шул сәфәрдән соң барысы башланды да инде. Һәм менә инде 24 нче тапкыр ярдәм йөге алып бару... Тәүге сәфәрдә үк юлыбыз Дебальцевога төште. Без баштарак барганда анда юллар да юк иде — җимереклек, юл билгеләре юк. Адым саен блок-постлар, тикшерүләр. Аннары кызыл зона, анда гуманитар йөк кертми иделәр. Вакыт узу белән тәртип кенә түгел, азат ителгән территорияләрнең тышкы кыяфәте дә үзгәрде. Күз алдына китерегез, без бу өлкәләргә йөри башлаганда тирә-якта җимереклек хөкем сөрә иде, — дип сөйли Ринат. — Ишелгән коймалар, шифер түбәләр... Ә хәзер? Бөтен җирдә яңа профнастиллар, ягъни бирегә дә цивилизация килеп ирешә. Юллар төзелә, мәктәпләр, балалар бакчалары, йортлар ремонтлана... Бик сизелә бу. Әгәр башта машиналарга кием-салым, азык-төлек, йокы капчыклары һәм оекбашлар төялсә, бүген исемлекләрдә катлаулы җиһазлар, элемтә чаралары, РЭБ системалары, аларга запас частьләр, рацияләр... Сызык артындагы егетләр үзләре үк билгели, кием-салым һәм азык-төлек белән тәэмин итү күпкә яхшырган. 
— Безнең төркемдә инде 300 волонтер исәпләнә, — дип сүзгә кушыла Марс Ямалиев. — Ә егетләрдән шырпыдан алып бронежилетларга һәм җиңел автомобильләргә кадәр үтенечләр килә. Озатуга инде унынчы машинаны әзерлибез. Машиналарны үзебез эзлибез, алабыз, төзәтәбез, тагабыз да илтеп бирәбез. Ун рацияне күптән түгел генә сатып алдык. Юлда төрле очраклар була. Көтелмәгән ватылулар да, дроннарга эләгү дә, аларны эзәрлекләү дә... Бернигә карамый, алга таба барабыз.
Егетләрнең чираттагы баруы турында сугышчылар гына түгел, аларның якыннары да белгән, шуңа күрә күпләр шәхси посылкаларын тапшыруны сораган. Йөк төягәндә шул ачыклана, ил сакчыларына илтергә теләгәннең хәтта өчтән бере дә зур тагылмага сыймаячак.
Ә бит шактый әйбер алып барырга кирәк. Иң беренче чиратта — егетләр үзләре сораган йөк: генератор, аккумуляторлар, мичләр, май, ОСБ, пленка, газ баллоннары, рацияләр, төзелеш материаллары... Аңлашыла ки, салкыннарда җылы оекбашлар, бияләй, окоп шәмнәре дә бик кирәкле.
Ә маскировка челтәрләрен тылда ничек калдырырга? Сугышчылар белә — теләсә нинди үлчәм ятьмәгә заказ бирергә һәм аны һичшиксез алырга мөмкин. Безнең авыл җирлекләрендә хатын-кызлар аларны көн саен, теләсә нинди һава торышында әзерлиләр. Һәр тасмага үзләренең кул җылысын һәм кайгыртуын үрәләр, әлеге хезмәт әһәмиятен яхшы аңлыйлар.
— Тирә-як авыллардан җыелган дымлы салфеткаларны, гигиена чараларын, консерваларны, тозланмаларны, өйдә пешерелгән камыр ризыкларын да икенче тапкырга кичектереп тора алмадык. Посылкаларда иң изге теләкләр белән тулы балалар рәсемнәре, хатлары да бар иде, — дип бәянли Ринат. 
— Әлбәттә, сугышчыларның төрле эчлекле өй пирогларын, беленнәрен, яңа пешкән камыр ризыкларын да татып карауларын теләдек. Җирле хуҗабикәләр егетләргә үзләренең иң яхшы тәм-томнарын: кайнатма, компот, салатларын алып килгән иделәр....
Ә ул арада алгы сызыктагы егетләрдән сораулар яуды: «Бернәрсә дә гамәлдән чыкмыймы?», «Сез киләсезме?», «Кайчан көтәргә?». Без җибәргән һәр "әйе"гә җавап итеп шатлыклы смайликлар очты. Карарга тиз килдек: "ГАЗель«дә барабыз. Сәфәр авыр булырга ошый иде, әмма... Анда безнең егетләргә җиңел мени? Аларның ихлас шатлыгы, җылы сүзләре һәм ярдәм тупларга булышкан һәркемгә рәхмәтләре безнең өчен иң яхшы бүләк иде.
Сугышчы якташларыбыз белән очрашкач, посылкаларны тапшырабыз һәм тизрәк өйләренә кайтуларын теләп, арытаба махсус хәрби операция уздырыла торган зонага юл тотабыз. Анда якташларыбыз тыныч халыкны яклау бурычын үтиләр.
Биредә йөк хәрбиләрнең шәхсән сораулары буенча әзерләнгән иде. Күп өлешен туганнарыннан һәм якыннарыннан адреслы посылкалар тәшкил итте.
— Сугыш шартларында, якыннардан аерылганда, өйдән килгән һәр посылка аерым бер җылылык һәм туган бусага белән элемтә ул, — ди Алабакүлдән Олег Туймуллин.
Чыннан да, гуманитарка илтү запасларны тулыландыру гына түгел. Бу, беренче чиратта, бик зур рухи ярдәм, хуплау, егетләргә дәшү: сезне хәтерлиләр, сезне көтәләр, сезнең өчен бөтен ил белән борчылалар.
— Без егетләребезгә булышабыз һәм бу уртак эшне дәвам итәчәкбез. Хәзерге чорда ил сакчыларыбыз безнең ярдәмгә аеруча мохтаҗ, — дип ассызыклый Ринат Нуриев.
Ватан намусын яклаучы солдатларга ярдәм итү миссиясе күпме кирәк, шул кадәрле дәвам итәчәк. Һәр ул, йорт хуҗасы һәм ир туган газиз йортыннан зарыгып көткән хәбәрен алырга тиеш. Сугышчылардан актуаль үтенечләрне һәм маскировка челтәрләре үрелгән адресларны «ТылСВО» төркемендә табарга мөмкин. Һәркем кушыла ала. «ТылСВО» төркеменең элемтә өчен телефоны: 89375724451 (төркем администраторы).