Бәйрәкә мәктәбе юнармиячеләре сугыш яугире Инком Абдуллин белән очрашты

1944 ел башында 18 яшьлек Инкомны армиягә алалар, ул радистлыкка укый. 16нчы аерым элемтә батальоны исәбендә Абдуллин Икенче Украина фронтында алыша. Чехословакия, Венгрия, Румынияне азат итүдә катнаша. Җиңү көнен Братиславада каршы ала.
Инком Нәҗип улы юнармиячеләр белән очрашуга бик шат булды, хатирәләрен бик теләп уртаклашты. Балалар сораулар бирде, өлкән яшьтәге ветеран исә үсеп килүче яшь буынның, гомерен кызганмыйча, сугышның дәһшәтле юлларын үтеп, сабыйларга бәхетле балачак бүләк иткән кешеләр язмышына битараф калмавына чын күңеленнән куанды. Ветеран инде еракта калган сугышның шанлы вакыйгаларын искә төшерде һәм, өлкән яшьтә булуына карамастан (аңа сентябрьдә 99 яшь тула), балалар белән бик җылы аралашты, үзенә багышлап чыгарылган китапны күрсәтте. Балалар аның зирәк акылына гаҗәпләнде, ул әле булса гәзит-журналлар, китаплар укый. Ветеран сүзләренә караганда, ул "Коммунизмга" гәзитен яратып укый һәм көтеп ала икән. Районның "Ютазы таңы" гәзите элек шул исемдә чыккан, ул әле дә гәзитне шулай атый. Юнармиячеләр кызыклы һәм фәһемле әңгәмәсе өчен ветеранга рәхмәт белдерде.
Һичшиксез, укучыларның ветераннар белән мондый очрашулары ватанга тугрылык һәм шәфкатьлелек хисләре тәрбияли, чал чәчле ветераннарга ихтирамлы мөнәсәбәт күрсәтүнең мөһимлеген ассызыклый. Яшьләр өлкән буын вәкилләренә бәйрәм көннәрендә генә түгел, һәрвакыт һәм һәркайда файдалы булырга тиеш.

Юлия ДӘҮЛӘТБАЕВА