"Илһам чишмәләре" ансамбле районның барлык авылларында чыгыш ясый

Бу ансамбль язмышын мин инде егерме елдан артык күзәтеп яшим. Аларнын һәр чыгышының тамашачысы булырга, алар башкарган һәр җыр-моңнан хозурлык алырга тырышам. Әйе, коллективның исеме алышынды, кызганыч, ветераннарыбызның яшьләре дә арта бара... Ансамбльгә нигез салынган көннән алып бүгенге көнгә кадәр аның составында җырлап йөрүче Илгизә Шәймәрданова - иң өлкән ветераннарыбызның берсе.

"Илһам чишмәләре" ансамбле районның барлык авылларында чыгыш ясый. Алар башкарган җырлардан башка район Сабантуйлары, башка төрле мәдәни-күңел ачу чаралары узмый. Тамашачылар аларның чыгышын алкышлап каршы ала, үз итә, яңадан-яңа чыгышларын көтеп кала. Аларның иҗади хезмәтен район җитәкчелеге дә җылы бәяли. "Илһам чишмәләре" - халыкчан җырлары белән халык хөрмәтен казанган ансамбль. Шунысы кызганыч, мәдәни чаралар уздырганда, аларның чыгышларын иң соңыннан куялар. Ветераннар, олы яшьтә булуларына карамастан, төшенкелеккә бирелмиләр, тагын да яхшырак итеп чыгыш ясыйлар!