Районның 165 ветераны “Балкыш” конкурсында катнашкан

Ветераннарның быелгы башкару сәнгате фестивале Бөек Җиңүнең 70 еллыгына багышланды, шуңа күрә репертуары да әлеге датага туры китерелгән иде. Ягъни, аның нигезенә хәрби темага үзешчән сәнгать номерлары яткан. Башкаручыларны һәм тамашачыларны сәламләп, район башлыгы урынбасары Зәрия Рәшитова фестивальдә катнашу ветераннарның актив тормыш позициясе күрсәткече булуын ассызыклады. Фестивальнең район турын оештыручы район ветераннар советы рәисе Зоя Глушкова аның таләп ителгәнлеген билгеләп үтте - узган елда, әйтик, анда республика буенча биш меңгә якын кеше катнашкан. Фестиваль Республика ветераннар советы инициативасы, Хезмәт, мәшгульлек, социаль яклау министрлыгы, Мәдәният министрлыгы һәм Республиканың "Татмедиа" матбугат һәм гаммәви коммуникацияләр агентлыгы катнашында үткәрелә.

Бер көнне берьюлы ике концерт программасы узды. Жюри алтмыштан артык чыгышны карады. Фестивальдән соң Зоя Глушкова тәэсирләре белән уртаклашты: "Барлык катнашучылар да яхшы чыгыш ясады, аеруча авыл җирлекләре ветераннарына - афәрин. Фестивальдә катнашучыларны әзерләүгә клуб мөдирләре, җирлек башлыклары, ветеран оешмалары рәисләре күп вакытларын, хезмәтләрен, күңел җылыларын салганнар. Ә Ютазы авылыннан Фәния Әхмәтшина, Әбсәләмнән - Миңнегөл Мостафина, Бәйрәкәтамактан - Фәйрүзә Мортазина, Акбаштан - Нәфисә Хөснетдинова, Бәйрәкәдән Әлфия Хафизова кебек ветеран оешмалары рәисләре концерт программасында үзләре дә катнашты. Үз номерларын Урыссудагы 3 санлы мәктәп, район башкарма комитеты, "Электросоединитель", "Теплосервис", район мәдәният йорты ветераннары тәкъдим итте. Ә менә электростанция, руда булмаган материаллар предприятиесе, "Бетон+", химия заводы, Нефтекама базасы, хастаханә, 2 һәм 4 санлы мәктәп, гимназия ветераннары өч ел дәвамында бер генә тапкыр да чыгыш ясамады".

Фестивальдә катнашучылар үз номерларын зур рухлану белән башкарды. Безгә аларның берсе Бөтенроссия "Түгәрәк уен" татар фольклоры фестивале лауреаты Яңа Каразирек авылыннан җитмеш сигез яшьлек Клара Гарифуллина белән әңгәмә корырга мөмкин булды. Ул татар халык җырын музыкаль озатусыз башкарды. Клара ханым балачактан мәктәп концертларында, спектакльләрдә катнашкан. Вакытында ул үзлегеннән хромкада һәм тальян гармунда уйнарга өйрәнә.

Клара апның истәлекләре буенча, әтисе фронтка киткәч, әнисе дүрт бала белән бергә беркадәр вакыт апасында яши. Аның исә гармуны була, ә алты яшьлек кызчык аны күпме сораса да, аңа әлеге уен коралын бирмиләр. Шуннан кыз утын агачы ала да гармун тактына шакылдата. Шуннан бирле гармунда уйнарга өйрәнү аның якты хыялы була. Бу хыял әтисе кырык бишенче елда сугыштан кайткач һәм гаиләдә тагын бер бала тугач тормышка аша. Энесенең җиде яше тулуга гармун бүләк итәләр, әмма уйнарга биш баладан Клара гына өйрәнә. Әмма җырлар һәм уен мәкаләбез героеның мавыгуы булып кына кала. Башта ул медпунктта санитарка, аннары савымчы, бозау караучы һәм фермада лаборант булып эшли. Аның портреты Баулы шәһәрендә мактау тактасында эленеп тора. Клара ханым утыз ел дәвамында бианасы белән яши, утыз ел инвалид баласын тәрбияли. Җиңел булмаган тормышында күңел юанычын ул җырларда һәм музыкада таба.

Фестиваль ахырында жюри рәисе, район башкарма комитеты җитәкчесенең социаль мәсьәләләр буенча урынбасары Илдар Хаҗиев чарага әзерлек югары дәрәҗәдә булганлыгын билгеләп үтте. Жюри карары белән Әлмәттә узачак икенче турга Иске Каразиректән Зарима Кәлимова башкаруында аерым җыр, "Электросоединитель" заводы ветераннар оешмасының "Родники" вокаль ансамбле, Бәйрәкә авылыннан вокаль-инструменталь ансамбль, Бәйрәкәтамак авылы ветераннарының фольклор чыгышы, мәгариф бүлегеннән чыгыш ясаган Рәсимә Габбасованың нәфис сүзе, Әбсәләм авылыннан гармунчылар ансамбле һәм Ютазы авылыннан квартет чыкты.

Зоя Глушкова фестивальнең оештыру комитеты рәисе Фәрит Мөхәммәтшинның анда катнашучыларга юнәлтелгән сүзләрен җиткерде: "Сез бөтенләй үзгә миссия башкарасыз, безнең барыбызга да Татарстанның күп милләтле халкының бай мәдәниятен җиткерәсез, республика традицияләрен, тарихын саклыйсыз. Сез чын халык сәнгатен җиткерүчеләр. Җыр, бию һәм башка халык иҗаты төре ярдәмендә яшь буынны тәрбияләүгә зур өлеш кертүне дәвам итәсез".