Районның музыкаль коллективлары лаеклы җиңүләр яулыйлар

Сандугач сайрар илдә җиңүләр

Бөгелмә шәһәренең "Сосновка" сәламәтләндерү лагеренда "Сандугач сайрар илем" балалар иҗаты XVII региональ фестиваленең финаль туры узды, дип хәбәр итә Урыссу балалар музыка мәктәбе укытучысы Оксана Җәләева. Татарстан Көньяк-көнчыгышының 18 районыннан сиксәннән артык катнашучы салкыннардан куркып тормыйча, "Вокал. Аерым башкару" номинациясендә иң яхшылар исемен алуга ярышта катнаштылар. Фестивальне оештыручылар һәм Зилә Сөнгатуллина рәислегендәге һөнәри жюри билгеләп үтүенчә, катнашучылар елдан-ел остара бара. Иң яхшылар исәбендә Урыссу балалар музыка мәктәбе тәрбияләнүчеләренең исемнәре әйтелгән. Камилла Яркова (җит. Әлфия Батыршина) үз яшьтәшләре төркемендә III дәрәҗәдәге лауреат булган. Алия Хәсәншина (җит. Оксана Җәләева) II дәрәҗәдәге лауреат дипломы белән бүләкләнгән. Надия Имаева көтелгән беренче урынга лаек булган. Шулай ук "Рухият" рухи яңарыш фондының рәхмәт хаты белән I дәрәҗәдәге лауреатны югары дәрәҗәдә әзерләгәне өчен Оксана үзе - җиңүченең педагогы бүләкләнгән.

"Безне батырлыкларга Катюша рухландырды"

Урыссу балалар музыка мәктәбенең тәрбияләнүчеләре һәм педагоглары "Безне батырлыкларга Катюша рухландырды" дип аталган Республика конкурсында катнашкан. Ул Татарстан Республикасы мәдәният министрлыгының Республика традицион мәдәниятне үстерү үзәге тарафыннан оештырылган. Чара Әлмәт шәһәрендә узган. Традицион рәвештә әлеге конкурс рус музыкаль мәдәниятен пропагандалауга һәм тергезүгә юнәлтелгән.

Безнең районны конкурста "Пробуждение" рус җыры ансамбле һәм җырчы Надия Имаева тәкъдим итте. Алар төрле яктан югары бәяләнгән. Апрельдә Казанда узачак финалга үтүчеләрнең нәтиҗәләре соңрак игълан ителәчәк, дип хәбәр итте коллектив җитәкчесе. Финалчылар һичшиксез республика башкаласына барырлар дип өметләнәбез.

"Роза ветров-2014"

Урыссу балалар музыка мәктәбе укытучысы Ирина Иванаевская хәбәр итүенчә, Бөгелмәдә балалар һәм яшүсмерләр иҗатының "Роза ветров-2014" Халыкара конкурсы (үзешчән һәм һөнәри) узды. "Арт-Фестиваль - "Роза ветров" Балалар хәйрия фондын оештыручылар үзләренең VII Бөтенроссия конкурсына сайлап алу турын "Мәскәү- Бөгелмә - Транзит" дип атады. "Талантлы яшьләргә дәүләт ярдәме" һәм "Россия мәдәнияте (2012-2018 еллар)" Федераль максатлы программасы юнәлеше буенча "Мәгариф" өстенлекле илкүләм проекты кысаларында узган конкурсның XX юбилей сезонына 19 яшькә кадәр балалар һәм яшьләр иҗат коллективларының төрле номинациядә чыгыш ясаучы башкаручы-музыкантлары, биючеләре һәм вокалчылары чакырылды. Әлеге конкурста Урыссу балалар музыка мәктәбенең өч тәрбияләнүчесе, Ильяс Галимуллин, Марк Сачков (укыт. Ирина Иванаевская) һәм Аделя Якупова (укыт. Ольга Хөсәенова) катнаштылар. Алар өчен биниһая зур масштабтагы конкурс беренче җитди сынау булды. Үз яшь төркемнәрендә тыштан тыныч, үзләренә һәм уйнауларына ышанган безнең тәрбияләнүчеләр дипломантлар һәм III дәрәҗәдәге лауреатлар булды.

Музыка тыңлаганда, сүзләр артык

Февраль ахырында район мәдәният йорты сәхнәсендә музыкаль мәктәп тәрбияләнүчеләренең һәм укытучыларының "Музыка яңгырасын" дип аталган концерты узды.

- Тамашачылар даирәсен киңәйтеп, концерт программаларына без балаларны да, өлкәннәрне дә, кемне классик һәм заманча музыка, инсрументаль, хордагы һәм вокаль иҗат кызыксындыра - барысын да чакырабыз. Безнең максат - сәнгать дөньясына керергә һәм безнең мәктәптә укый башларга теләүчеләрне күбрәк җәлеп итү. Агымдагы ел республикада Мәдәният елы дип игълан ителү сәбәпле, концертыбызның тагын бер максаты - балалар игътибарын музыкага җәлеп итү, аларда сәнгать зәвыгы тәрбияләү һәм гомуми культура дәрәҗәсен күтәрү. Чөнки безнең өчен музыкага өйрәтү генә түгел, балаларның рухи дөньясына тәэсир итү дә, аларны әхлакый тәрбияләү дә әһәмиятле. Сәхнәдә чыгыш ясарга мөмкинлекләре булган укучылар киләчәктә уку өчен стимул алалар. Үз балаларының чыгышларын караган әти-әниләр мәктәптә уку процессына күбрәк игътибар бирә. Укыту сыйфаты яхшыра, чөнки укучылар үз укучыларын сәхнәдә күрергә телиләр, - дип ассызыклады музыка мәктәбе директоры Варвара Якупова әңгәмә вакытында.

Шуны билгеләп үтәргә кирәк, концерт номерлары кайнар алкышларга күмелде. Яшь тамашачылар, аларның әти-әниләре шундый ук яшь музыкантларга уч төпләрен кызганмады. Мәктәп тәрбияләнүчеләренә үз сәләтләрен югарыда әйтелгән конкурслар җиңүчеләре дә, яңа өйрәнә башлаучылар да күрсәтте. Алар аерым һәм ансамбльдә халык инструментларында, фортепианода, гитарада уйнады. Төрле зональ, республика, халыкара конкурслар лауреаты булган "Балалаечка" (укыт. Клара Галиева) ансамблен, яңа эшли башлаган вокаль ансамбльне (укыт. Земфира Чехонина), Урыссу балалар музыка мәктәбе укытучыларыннан торган "Экспромт" инструменталь ансамблен әйтеп узасы килә.

Концертның үзенчәлеге - яңа номерлар, җылы мохит булды. Укытучылар оркестры авазлары белән бергә кушылып, балалар чыгышлары музыканы җиңел, яшь тыңлаучыларга аңлаешлы итте. Концерттан балалар гына түгел, өлкәннәр дә шатлыклы бәйрәм кәефе белән китте.