Хатын-кызлар бәйрәмендә ир-атлар күбрәк күңел ачкан

Полиция хезмәткәрләренә исерек бәндәләрне предприятиеләрнең берсеннән, сәүдә-күңел ачу үзәгеннән һәм азык-төлек кибетеннән алып чыгарга туры килгән. Ютазы авылында яшәүче бер ир-ат хатынын котлап кына калмаган, җәнҗал да кубарган. Ике исерек ир заты Урыссуда яшәүче кешеләрнең торак ишекләрен җимерергә теләгән. Гүзәл затлар арасыннан да исерткеч эчемлек яратучы бер зат үзен тәртипсез тоткан. Ул да, шулай ук, күп фатирлы йорттагы бер фатир ишегенә ябырылган, шул рәвешле ул яшәүчеләрнең ризасызлыгын тутырган.