Иске Урыссу халкы Чишмә бәйрәмен билгеләде

Бирегә яшь кызлар чиләк-көянтә асып суга йөргән, биредә алар сөйгән ярләре белән танышкан, яшерен генә очрашуларга йөгергән. Иске Урыссу авылында узган күркәм йолага әверелгән Чишмә бәйрәменең нигез темасы – нәкъ менә шушы буыннар арасындагы тере тарих иде. Авыл халкын котларга район башлыгы Аяз Шәфыйгуллин да килде. Гармунчылар парадыннан соң тәбрикләү сүзе белән чыгыш ясады ул. Башлык халкыбызның һәрвакыт чишмәләрне кадерләвен, аларны саклавын билгеләде:

— Үзенә тартып торучы бик гүзәл урын. Чишмә бәйрәме матур йолага әверелсен. Без, татарларда, туй көнендә күркәм гадәт бар – яшь киленгә су юлы күрсәтәләр. Бирегә дә гаилә коручылар су алырга килсен, биредә танышсыннар һәм яңа гаиләләр барлыкка килсен, чишмә исә аксын да аксын, суы бервакытта да корымасын, - диде  Аяз Әдип улы.

Бүләкләү тантанасы кысаларында авылның җирлек тормышында актив катнашучы кешеләре район башлыгының рәхмәтенә лаек булды. Зира Кашапова, Илдар Гобәйдуллин һәм Камелия Мөхәмәтҗанова бу.

Бөгелмәдән килгән кунаклар – Иске Урыссуда туып үскән Нәҗип Килдеяров җитәкләгән гармунчыларның “Моң” халык ансамбле чыгышы якташлары өчен төп бүләк булды. Эдуард Гафиятуллин челтерәп аккан чишмә янында башкарган татар халкының дәртле җырлары һәм көйләре бәйрәм кунакларын таң калдырды.

Программаның аеруча күңелле өлеше – авыл җирлекләре гүзәлләре арасында үткәрелгән “Чишмә гүзәле- 2026” конкурсы иде.  Кызлар агач көянтәләр асып чишмә янына чыкты, үзләренең визит карточкаларын тәкъдим итте, аннары сәнгать номерлары белән чыгыш ясады. Аларның осталыгын Аппарат җитәкчесе  Марьяна Вәлиуллова, районның хатын-кызлар советы җитәкчесе Зөлфия Әминева һәм ветераннар советы рәисе Гүзәл Латыйпова исәбеннән дәрәҗәле жюри бәяләде. Конкурс йомгаклары буенча исемнәр шул рәвешле бүленде:

1. Бәйрәкә авылыннан Таңсылу Ямаева — “Матур биюче” бүлегендә җиңүче.

2. Кече Урыссудан Зәринә Зарипова - “Иң мөлаем” бүлегендә җиңүче.

3. Кече Урыссудан Зәлинә Солтанова – “Иң изгелекле” бүлегендә җиңүче.

4. Кәрәкәшледән Диана Шакирова – “Сәхнә остасы” бүлегендә җиңүче.

5. Иске Урыссудан Лилиана Мәрдәнова – “Иң матур җырлаучы” бүлегендә җиңүче.

6. Иске Урыссудан Риана Йосыпова – “Иң нәзакәтле” бүлегендә җиңүче.

7. Подгорныйдан Зөлфия Исхакова – «Иң нәфис сынлы кыз».
8. Иске Урыссудан Эльнара Хәлилова – «Иң гүзәл кыз».

Кунаклар театральләштерелгән тамашаны дулкынланып күзәтте: авылда яшәүчеләр беренче тапкыр очрашуларын һәм мәхәббәт аңлатуларын искә алырга дистә елдан соң шушы чишмә янына кайткан парның күңелләрне иләсләндергән тарихын күрсәтте. Бу күренеш тамашачыларны яшьлегенә алып кайтты, чөнки язмышларын нәкъ шушында бәйләгән бу парны барысы да белә. Күркәм гадәт буенча бирегә килгән һәркем, бәхет һәм сәламәтлек теләп, иң башта Исмәгыйль чишмәсенең боздай салкын суы белән битен юды.

Урыссу авыл җирлеге башлыгы Фәния Әминева сөйләгәнчә, оештыручылар һәр мизгелне җентекләп уйлаган. Гүзәллек конкурсында һәм тантанада катнашучылар мәгънәле бүләкләргә ия булды: шушы чишмә суы тутырылган шешә, биредә үскән үләннәрдән чәй, чыганак төшерелгән сувенир һәм истәлекле календарь бу.

Чара чын халык бәйрәменә әверелде. Балалар концерт чыгышларында һәм халык уеннарында катнашты. Янәшәдә зур казанда кунаклар өчен хуш исле пылау пеште. Авыл халкы чәй өстәлен үзләре әзерләде, аларның һәркайсы йортларында ризык пешереп алып килгән. Чараны алып баручы, хатын-кызлар советы рәисе Зира Кашапова рәсми өлештән соң һәркемне кайнар пылау белән сыйланырга чакырды.

Халкыбыз гореф-гадәтләрне саклый һәм гади көнне бәйрәмгә әверелдерә белә. Әмма Иске Урыссу халкы моны аеруча җылы, кунакчыл һәм киң күңеллелек күрсәтеп эшли. Алар чираттагы тапкыр кече ватанга мәхәббәтнең тамырларыңа сакчыл караштан башлануын раслады.