«Ютазы районы чакырылыш комиссиясе карары белән Сез хәрби хезмәткә яраклы дип таныласыз » – берәүләр бу сүзләрне тиешле дип кабул итә, икенчеләр - әллә ни куанмый.
Әмма, балигъ булган егетләрнең кәефе һәм теләге булу-булмауга карамастан, һәр яз һәм көз Ватаныбыз аларны гражданлык бурычларын үтәргә чакыра.
Гадәттәгечә көзге чакырылыш 1 октябрьдә башланды. Хәрби хезмәткә чакыру кампаниясе Ютазы районында да старт алды. 9 октябрьдә чакырылыш комиссиясенең беренче утырышы булды, аның нәтиҗәләре буенча армиягә иң элек 5 егет китәчәк.
Барлыгы исә көзге чакырылыш чорында Русия армиясе сафларын 21 ютазылы тулыландырырга тиеш дип көтелә. Әйтергә кирәк, чакырылган егетләрнең рух күтәренкелеге һәм хезмәт итү теләге зур.
Чакырылыш комиссиясе тәмамлангач, без Баулы шәһәре, Баулы һәм Ютазы районнары хәрби комиссары Илшат Халитовка берничә сорау белән мөрәҗәгать иттек:
- Илшат Назимович, гомумән алганда көзге чакырылыш ничек уза, нинди дә булса үзенчәлекләр бармы?
- Көзге чакырылыш кампаниясе гадәттәге тәртиптә уза. Хәрби хезмәткә беренче озатылучылар 19 октябрьдә китәчәк. 2026 елның 1 гыйнварыннан армиягә чакырылу ел әйләнәсе дәвамында була. Ягъни чакырылыш чаралары ел дәвамында, 1 гыйнвардан 31 декабрьгә кадәр уза. Шул ук вакытта хезмәткә озату элеккечә елга ике тапкыр оештырыла - 1 апрельдән 15 июльгә кадәр һәм 1 октябрьдән 31 декабрьгә кадәр башкарыла.
- Хәрби хезмәткә чакырылучыларның армияга мөнәсәбәте үзгәрәме?
- Армиянең абруе елдан-ел арта, күп кенә хәрби хезмәткә чакырылучыларның «срочка»ны үтеп, контрактка кул куюы гаҗәп түгел, чөнки армиядә хезмәт итү – тотрыклылык һәм озак вакытлы хезмәт мөнәсәбәтләре бит.
- Әңгәмәбез ахырында сез хәрби хезмәткә чакырылу яшендәге егетләргә нәрсә теләр идегез?
- Барыннан да элек, хәрби хезмәттән курыкмаска. Аңа алдан әзерләнергә, беренче чиратта – физик яктан. Шулай ук һәр ир-ат үз Ватанын яклый белергә тиеш икәнен истә тотарга кирәк. Һәм моңа армиядә генә өйрәтә алалар.
Нет комментариев