Фельдшер Сафия Галимова табиблар нәселеннән

Аларның гаиләсенең дүрт буыны үзләрен кешеләрнең сәламәтлеген саклауга багышлаган. Әнисе, сеңлесе, әбисе, бабасы, апасы… Ак халатлы кешеләрнең тулы  бер нәсле! Шуңа күрә кызның мәктәпне тәмамлаганчы ук кайда укырга барачагы билгеле булган - медицинага. Чөнки аның якыннарының барысы да үзләрен шушы тармакка багышлаган. Шуңа күрә 9нчы сыйныфны тәмамлагач, Сафия кая барырга дип озын-озак уйлап та тормаган – Бөгелмә медицина училищесына шәфкать туташлары бүлегенә укырга кергән. Ә аннары, җаваплырак эшкә омтылыш сизеп, фельдшер белеме алырга карар кыла һәм Туймазы медицина училищесына укырга керә. Гомумән алганда, ул укуга 7 ел вакытын сарыф итә! Аны һәрвакыт ашыгыч ярдәм хезмәтендәге эш җәлеп итә, анда һәр секунд хәлиткеч булырга мөмкин. "Иң беренче авыруымны гомерем буена хәтерлим, – дип уртаклаша Сафия. – Бу йөрәк өянәге белән илле яшьләрдәге ир-ат иде. Кеше синең гамәлләрең ярдәмендә теге дөньядан кайткач, тел белән әйтеп бетергесез бәхет кичерәсең". Ашыгыч хәл итү, тиз арада ярдәм итү таләп ителгәндә, мәсәлән, юл-транспорт һәлакәтләрендә, Сафия пациентларның хәлен тиз бәяли белү сәләтенә ия. Без аралашкан арада, безгә Сафиянең шулай ук Урыссу үзәк район хастаханәсендә эшләүче сеңлесе Жасмин да килеп кушылды. Бергә эшләве һичәиксез күңелледер бертуган кызларга!

Ире Айрат белән бергә алар уллары Артурны тәрбияли, ул кечкенә яшьтән үк хастаханәдә үсә, табиблар белән аралаша. Биредә «егет» инде үз кеше булып беткән һәм, бәлкем, гаилә нәселен бишенче буында дәвам иттерер яки әтисе кебек футбол буенча тренер булыр. "Безнең эштә иң мөһиме – пациентларга якын күрү, ярату, – ди Сафия. – Кешеләрне яратмый торып  биредә эшләп булмый". Сафия Галимовага һәм Урыссу үзәк район хастаханәсенең барлык ашыгыч ярдәм хезмәткәрләренә иминлек, сәламәтлек һәм рәхмәтле пациентлар телибез! Сезнең хезмәтегез бәяләп бетергесез!