Ютазы җире талантларга бай

Апрель ае гомумән Район мәдәният йорты өчен чагу вакыйгаларга аеруча бай булды. Ике үзешчән сәнгать концерты Ютазы халкы өчен чын мәгънәсендә иҗат һәм сәләт бәйрәменә әверелде. 

Быел смотр-бәйге Русия Федерациясендә игълан ителгән Гаилә елына һәм Татарстан Республикасындагы Фәнни-технологик үсеш елына багышланды. Исегезгә төшерәбез, әлеге бәйге ел саен уздырыла һәм халык иҗатын арытаба үстерү, үзешчән сәнгать өлкәсендәге иң яхшы гореф-гадәтләрне саклау һәм яңа сәләт ияләрен ачыклау максатында үткәрелә. 

Үзешчән коллективлар һәм башкаручылар сәнгать иҗатының төрле юнәлешләрендә һәм жанрларында чыгыш ясады: вокал ансамбле, фольклор, хореография, нәфис сүз, үзенчәлекле жанр һәм конферанс.

Ютазы районы сәнәгать предприятиеләре һәм бюджет оешмалары арасында үзешчән сәнгать смотр-конкурсы.

Педагоглар, тәрбиячеләр һәм методистлардан торган мәгариф бүлеге хоры тантаналы рәвештә Ютазы районының сәнәгать предприятиеләре һәм бюджет оешмалары арасындагы үзешчән сәнгать смотр-конкурсының йомгаклау концертын ачып җибәрде. Чарада катнашучылар әзерләгән барлык номерлар да күркәм, гаҗәеп күренешле һәм ифрат кызыклы-мавыктыргыч булып чыкты. Тамаша бер сулышта, илаһи көй-моң дулкыннарында, искиткеч җылы-дустанә мохиттә узды. Торган саен гаҗәпкә каласың, кайдан хасил була икән районыбызда шулкадәр дә сәләт ияләре? 

Жюри әгъзалары фикер алышкан арада, Мәдәният йорты артистлары тамашачыларга үзләренең иң яхшы музыкаль номерларын бүләк итте.

Концерт программасы ахырында Ютазы район советы аппараты җитәкчесе Марьяна Харисова һәм район мәдәният бүлеге башлыгы йомгаклау концертында катнашучыларны җылы тәбрикләде һәм чагу чыгыш ясаучыларга истәлекле бүләкләр тапшырды. Зал көчле алкышларга күмелде. 

Ютазы районы авыл мәдәният учреждениеләре арасында үзешчән сәнгать концерты.

Ютазы районы авыл халкы Район мәдәният йорты сәхнәсендә үз сәләтләрен балкытуга иреште. Авыл мәдәният учреждениеләре арасында район үзешчән сәнгать ияләренең «Гаилә — яшәү билгесе» смотр-бәйгесе сайлап алу этабының берничә ай нәтиҗәләренә йомгак ясалды.

Районның төп сәхнәсендә иң сәләтле һәм оста иҗат коллективлары, сәнгатьле шигырь укучылар һәм солистлар очрашып, тамашачыларга үзләренең матур, күркәм чыгышларын тәкъдим итте. Һәр чыгыш үзенә генә хас милли бизәк белән аерылып торды.

Үзешчән коллективлар һәм башкаручылар сәнгать иҗатының төрле тармагын һәм жанрын тәкъдим итте: вокал ансамбле, фольклор, хореография, нәфис сүз, үзенчәлекле жанр, декоратив — кулланма иҗат, конферанс. Моннан тыш, Мәдәният йорты фойесында декоратив-кулланма иҗат эшләре күргәзмәсе ачылды.

Йомгаклау концертының музыкаль өлешендә һәм бәйге ахырында үз чыгышлары белән тамашачыларны һәм жюри әгъзаларын әсир иткән сәләт ияләрен бүләкләү тантанасы булды.

Район мәдәният бүлеге башлыгы Рөстәм Абдрахманов һәм Район мәдәният йорты директоры Николай Гребенюк конкурста катнашучыларга изге теләкләрен юллады, җиңүчеләрне тәбрикләп, бүләкләр тапшырды.

Бәйгечеләр үз чыгышларын шул дәрәҗәдә кызыклы һәм кабатланмас итеп күрсәтте ки, концертның озак баруына да карамастан, вакыт сизелми узып та китте.

Анастасия МИХАЙЛОВА