Яңа уку елы алдыннан район Мәдәният йортында инде күркәм йолага әверелгән чара – педагогларның август конференциясе узды.
ТР Мәгариф һәм фән министрлыгының дәүләт программаларын һәм проектларын тормышка ашыру бүлеге начальнигы Фәридә Зәйнетдинова, район башлыгы Аяз Шәфыйгуллин, район башкарма комитеты җитәкчесе Светлана Самонина, мәктәп директорлары һәм башка педагогия хезмәте эшчәннәре катнашкан педконференция эшендә төп мәсьәләләр тикшерелде һәм алда торган эш юнәлеше билгеләнде. Пленар өлеш алдыннан РДК фойесында районның балалар бакчаларында тәрбияләнүчеләр оста куллары башкарган күнекмәләрне күрсәтте. Сабыйлар бар эшне дә булдыра! Алар дәрәҗәле кунакларга үз эшләнмәләрен тәкъдим итте, төрле кәсеп һәм һөнәр нечкәлекләрен үзләштерүен күрсәтте.
Чыгышлар өлеше гадәттәгечә РФ мәгариф министры Сергей Кравцовның видеомөрәҗәгатеннән башланды. Ул 2026 елның 1 сентябреннән көченә кергән яңалыкларга аеруча зур игътибар бүлде. Оешма башлыгы билгеләвенчә, төп үзгәрешләр уку планына, бәяләү системасына һәм дәрестән тыш эшчәнлеккә кагыла. Төп яңалык — бишенче сыйныф укучыларының яңартылган уку планына күчүе. Аларның расписаниесендә яңа — «Русиянең рухи-әхлакый мәдәнияте» фәне барлыкка киләчәк. 2026-2027 уку елының икенче чирегендә Русиянең барлык мәктәпләрендә яңа дәрестән тыш курс — «Ясалма фәһем һәм мәгълүмати хәвефсезлек» кертелү мөһим өстәмәгә әвереләчәк. Аны эшләүчеләр фикеренчә, бу адым укучыларга заманча технологияләр белән эшләү нигезләрен үзләштерү мөмкинлеге бирәчәк. Сентябрьдән баланы уку эшчәнлегенә акрынлап кертүгә әзерләүгә исәпләнгән яңа «Игелекле уеннар» проекты башланачак. Бу мәктәпләрдәге "Мөһим нәрсәләр турында сөйләшү"гә охшаш.
Педконференциядә төп доклад белән мәгариф бүлеге начальнигы Сергей Абрамов чыгыш ясады. Үз чыгышында ул яңа уку елында педагоглар эшчәнлегенең өстенлекле ысулларына тукталып, мәгариф традицияләренең буыннан-буынга күчә баруының, яшь буынга белем һәм тәрбия бирүдә заманча караш кертүгә әзерлекнең мөһимлеген ассызыклады. Ул районның барлык балалары өчен тигез мөмкинлекләр булдырылуын билгеләде.
— Икенче ел рәттән, — дип билгеләде Абрамов, — балалар бакчалары тәрбияләнүчеләре "беренчеләр хәрәкәте«ндә катнаша. 1 сентябрьдән «Орлята-дошколята» хәрәкәтен башлап җибәрү мотлак. Яңа уку елында Русия мәктәпләрендә җәмгыять белеме фәне 9-11 сыйныфларда гына укытылачак. 8–9 сыйныфлар өчен акрынлап тарих буенча, 9–10 сыйныфлар өчен җәмгыять белеме буенча бердәм дәреслекләр кертелә. «Ватанны саклау һәм иминлек нигезләре» фәне буенча федераль программага да үзгәрешләр кертеләчәк.
Август конференциясенә йомгак ясап, Фәридә Зәйнетдинова район педагогларын бик мактады. Ни генә дисәң дә, «Укуда аерым уңышлары өчен» медальгә дәгъва иткән 14 укучының барысы да имтихан сынауларын уңышлы үтте һәм бу югары бүләккә хокукын тулысынча раслады. Районның яңа бурычлар белән илһамланган педагоглар берлеге һәр балага сыйфатлы белем һәм тәрбия бирү өчен җиң сызганып эшкә тотынырга әзер. Исегезгә төшерәбез, районда 2119 бала укыган 14 мәктәп эшли, 740 сабый тәрбияләнгән 17 балалар бакчасы гамәлдә.
Конференция эше хезмәттә зур уңышларга ирешкән педагогларны бүләкләү чарасы белән тәмамланды, аны ТР мәгариф һәм фән министры белән район башлыгы җитәкләде. Мәгариф оешмасын яңа уку елына әзерләүдә муниципаль конкурс йомгаклары буенча «Ел мәктәбе-2026» җиңүче дипломына 2нче Урыссу мәктәбе, «Ел балалар бакчасы-2026» җиңүче дипломына 7нче Урыссу балалар бакчасы лаек булды. Югары һөнәри казанышлары һәм намуслы хезмәте өчен «ТР Электрон мактау тактасы» сертификаты белән бүләкләнделәр:
— Роза ӘФЛӘТУНОВА, 3нче Урыссу мәктәбенең башлангыч сыйныф укытучысы;
— Илдар ДҮСӘЛИМОВ, Урыссу интернат-мәктәбе директоры;
— Рәмилә Зиннәтуллина, Урыссу гимназиясенең рус теле һәм әдәбияты укытучысы;
— Тамара ЗЫЯТДИНОВА, 4нче Урыссу балалар бакчасының өлкән тәрбиячесе;
— Галина ИВАНОВА, 7нче Урыссу балалар бакчасының балаларны татар теленә өйрәтү буенча тәрбиячесе;
— Алсу ЛАТЫЙПОВА, Ютазы мәктәбенең химия һәм биология укытучысы;
— Нина ТОКАРЕВА, 3нче Урыссу балалар бакчасының укытучы-логопеды.
Нет комментариев