Ютазы районының Балалар иҗаты үзәге тәрбияләнүчесе “Илһам” Бөтенроссия яшь иҗатчылар бәйгесендә II дәрәҗәле дипломга ия булды

Анда "Иң яхшы татар теле һәм әдәбияты укытучысы", "Илһам" яшь иҗатчылар бәйгеләренә, Халыкара олимпиадага нәтиҗәләр ясалды. Бу чараларда безнең районыбыз укучылары да көч сынашты. Татар телен, әдәбиятын, мәдәниятен саклау һәм үстерү, укучыларда әдәбиятка, сәнгатькә кызыксыну уятуга юнәлдерелгән "Илһам" Бөтенроссия бәйгесенең "Яшь драматург" номинациясендә Балалар иҗаты үзәге каршында эшләүче "Сихри каләм" берләшмәсе тәрбияләнүчесе Лиана Хәйруллина (җитәкчесе - Г.А. Садрутдинова) II дәрәҗәле диплом һәм конкурсның махсус статуэткасына лаек булды. Ул Бәйрәкә урта гомуми белем бирү мәктәбенең 10 сыйныфында белем ала. Бу бәйгедә шулай ук районыбызның тагын 6 укучысы мәгариф һәм фән Министрлыгы дипломнары белән бүләкләнде.