Корыч юллар тимер холыклы булуны таләп итә

Офис кәгазе һәм каһвә аңкып торган һөнәрләрдән тыш креозот, суынган металл исе китергән, корыч магистральләрнең иксез-чиксез иреге белән күңелне иләсләндергәннәре дә бар. Күпмедер дәрәҗәдә безнең Урыссу бистәсе – тимер юлчылар хезмәтенә һәйкәл ул. Биредә тәгәрмәчләр текелдәве күптән тормыш ритмының төп бишек җырына әверелгән, корыч юллар исә һәр икенче гаилә тарихына кагыла. Бездә язмышлары нәкъ тимер юл белән тыгыз бәйләнгән   династияләр бик күп.

Мин үзем – биредәге юлчылар оныгы. Әнием ягыннан бабам Инсаф гомер буе шпаллар салды. Аның бертуган абыйлары (?)  Миргасыйм, Миргазиян һәм сеңлесе  Сәхия дә гомерләрен биредә, Урыссуда, тимер юлына багышлаган кешеләр. Хәзер аларның оныклары һәм онык балалары династияне дәвам итә, ДЕПОда җитәкче вазифалар били. Миңа тормоз башмагы яисә рельсларны күчерү дигәнне аңлатырга кирәкми – боларны мин балачактан беләм. Бүген исә без якташларыбызны шундый нәсел вәкиленең янә берсе – Павел Викторович Анисимов белән таныштырырга телибез. 5нче Урыссу мәктәбен тәмамлаганнан соң ул Уфа тимер юл техникумына укырга керә.

– Безнең Урыссу бистәсе аша тимер юллар үтә, тимер юл вокзалы да бар, димәк, минем тимер юлчы һөнәрен сайлавым гаҗәп түгел. Башта УГРЭСта эшләдем, 2005 елдан юлчы булып күчтем, - дип сөйли Павел Викторович.

Шуннан алып ул юл монтёры булып эшли, тимер юл артерияләрен карап-тикшереп тору белән шөгыльләнә. Аның эше бистә уянганчы ук башлана. Ул һәм аның  бригадасының һәр иртәсе катгый киңәшмәдән башланып китә. Павел Викторович җитәкчеләргә кайсы участокта нәрсә белән шөгыльләнәчәкләрен, сменага ничә кеше чыгуын, кайда металл таушалганын  хәбәр итә. Шушы кыска иртәнге инструктажга иң мөһиме – меңләгән пассажирның иминлеге һәм безнең аша узган миллионлаган тонна йөкнең саклыгы бәйле.

Юлчылар тагын нәрсә белән шөгыльләнә? 

Аларның хезмәте уңайлы вагонда урнашып алган пассажирга күренми, әмма алардан башка бер генә состав та урыныннан кузгалмый.  Юлчылар – үз иңнәрендә илебезнең корыч пульсын тотып торган кешеләр.  Теләсә нинди һава торышында – көйдергән кояш булсынмы, көзге пычракмы яисә зәмһәрир салкыннармы ул – алар линиягә чыга.

Алар какшаган култыксаларны тарттыра, таушалган подкладкаларны һәм рельс корылмаларын алыштыра, юл геометриясен турайта, юлны күчерүне күздә тота. Кыш көне юлчылар беренчеләрдән булып кар баскан перегоннарга бара, юлларны боз һәм кардан тазарта. Җәй көне – чүп үләннәргә һәм металлны эретүче эссегә каршы көрәшә. Бу чыдамлылык, инженер төгәллеге һәм җилдереп килүче составтан курыкмауны таләп итүче авыр физик хезмәт. Машинист поездга идарә итсә, юлчы шушы поездга хәрәкәт итү мөмкинлеге бирә.

Хатыны Оксана исә һәрвакыт янәшәсендә — ул станция буенча она дежур. Павел Викторович алдагы юлның тигез һәм ышанычлы булуын тәэмин иткәндә, Оксана пульт артында поездлар хәрәкәтен күзәтә. Аларның гаиләсе – бәләкәй генә, әмма пөхтә көйләнгән диспетчер пункты, анда җирнең ир-ат көче һаваның хатын-кыз төгәллеге белән очраша.

Анисимовлар ике ул тәрбияли. Олысы Илья Казанда — ул поездлар түгел, йортлар төзи, төзелеш тармагында эшли. Кечесе Роман әлегә үз маршрутын эзли: ул Октябрьский коммуналь-төзелеш колледжында укый. Слушая Павел Викторовичны тыңлагач, шуны аңлыйсың: кече улларының нинди һөнәр сайлавы мөһим түгел. Иң мөһиме, әтиләренең намуслы хезмәте, сөялле куллары һәм җаваплылыгы үрнәгенең мәңгелеккә аның өчен ир-егет холкы бизмәне булып калуы. Сәнәгатьтә һәр җирдә күзәтелгәнчә, кадрлар кытлыгы биредә дә сизелә. Яшьләр бүген, көйсез һава торышы һәм физик киеренекелектән куркып,  ешрак офислар һәм читтән торып эшләү ягына каера. Аларга галстук такмыйча карьера эшләп булмый кебек тоела.

Павел Анисимов һәм аның хезмәттәшләре кебек кешеләргә карап, шуны аңлыйсың: әле шундый династияләр юлларыбыз сагында торганда, әле уллары шпаллар өстенә иелгән әтиләрен күзәткәндә, безнең магистраль бервакытта да ышанчлы рельслардан чыкмаячак. Урыссуның корыч юлы өзелмәячәк, чөнки аны гади эшчеләр генә түгел, бурычны намустан өстен күргән, “кирәк” дигән сүзне сварка җөеннән ныклырак дип исәпләгән кешеләр үрә.