Ютазы районында меңнән артык бала сәламәт яшәү рәвеше сайлаган

- "Олимп" спорт комплексында һәм "Атлант" үсмерләр-яшьләр клубында спортның 14 төре буенча секция эшли. Тренерлар составы Рузил Әхмәдуллин, Динар Әюпов кебек яшь һәм өметле кадрлар белән тулыланып тора. Ә инде әледән-әле югары уңышларга ирешүче спорт төрләренә килсәк, мин авыл районнары арасында республика рейтингында җиңүче урынын яулаган чаңгы спортын атар идем. Безнең чаңгычыларның казанышларын ил җитәкчелеге дә күрми калмады - ул районга модульле чаңгы базасы бүләк итте. Республиканың көньяк-көнчыгыш төбәгендә җиңүче исемен яулаган картингчылар безне шатландыра. Бокс, гер, футбол, шулай ук, уңай нәтиҗәләргә ирешүче спорт төрләре. Һәм аларның кайсысы белән генә шөгыльләнмә, районда бөтен шартлар да бар, - дип сөйли район башкарма комитеты җитәкчесенең социаль мәсьәләләр буенча урынбасары Светлана Пройдакова.