Нинди яшь булган алар, ихластан яратканнар…

Район ветераннар хәрәкәте әгъзаларын җыйнаган истәлекле очрашу бик җылы тәэссоратлар  калдырды. Әлеге чара игелек һәм җанлы тормыш рәвешенә нигез салучы өлкәннәребезгә  ихтирам, хөрмәт күрсәтү мөмкинлеген бирде. Бәйрәмдә катнашучыларны чын күңелдән район ветераннар советы рәисе Гүзәл Латыйпова тәбрикләде. Бу көнне күп еллар дәвамында бар көч-куәтен һәм тәҗрибәсен  ветераннар җәмгыятенә хезмәт итүгә багышлаган якташларыбызны хөрмәтләделәр. Алар үз вакытында районның ветераннар хәрәкәтен җитәкләгәннәр. Аеруча рәхмәт сүзләре район ветераннар советының элеккеге рәисе, көмеш волонтерлар җитәкчесе Зоя Глушкова исеменә җиткезелде. Аның төпле җитәкчелегендә алып барылган һәм ветераннар советының бүгенге эшләренә ныклы нигез салган киң колачлы иҗтимагый хезмәтне  бәһаләп бетерү мөмкин түгел.
Чараны оештыручылар  узган хезмәт казанышлары турындагы якты хатирәләр тулы җылы-дустанә  мохит тудырырга тырыштылар. Ютазы төбәгенең үткәненә кыскача сәяхәт ясарга музей экскурсоводы Надежда Демина булышты, ул кунакларны заллар буйлап озата барды, һәр  тематик юнәлешкә аерым тукталды. Гүзәл Латыйпова билгеләгәнчә, Урыссуда чагыштырмача күптән түгел эшләп килүче район музее  ветераннар өчен кызыклы һәм эчтәлекле очрашулар мәйданчыгына әверелә бара. Район ветераннары белән нәтиҗәле хезмәттәшлек итүләре өчен музей коллективына рәхмәт белдереп, ул  Гөлнара Шәмсуллинага, Надежда Деминага һәм Эльвира Исламовага грамоталар тапшырды. Шулай ук быел юбилейларын билгеләп үткән ветераннарны –  Людмила Афанасьева, Нәфисә Хөснетдинова һәм Ринат Әхмәдышинны да хөрмәтләделәр. Бәйрәм мул табын артында дәвам итте. «Элекке гвардия» – туган як мәнфагәтендә яшәгән һәм эшләгән, лаеклы ялга чыккач та читтә калмаган, ветераннар хәрәкәтен берләштерү буенча  күләмле эшне җитәкли алган апа-абыйлар очрашуы иде бу. Бәйрәм кичәсен зур осталык белән район ветераннар советы президиумы әгъзасы Татьяна Гарифуллина алып барды. Ул билгеләп үткәнчә, әлеге чара  – быелгы «Чын күңелдән» очрашулар  циклын йомгаклаучыларның берсеннән. Программа ифрат бай  һәм  күңелле иде: «Ивушки» триосы башкаруында яраткан җырлар, тирән эчтәлекле шигырьләр яңгырады, ә чәй табыны артында җылы әңгәмә барчасына якты елмаюлар  һәм чын рухи бәйрәм тойгысы бүләк итте. Асылда, тантана сәбәпчеләре  төбәгебезнең тере тарихын, аның «алтын вәкиллеген» гәүдәләндерә. Оештыручылар әлеге  кичәне үткәннәргә сагынычлы сәяхәткә әверелдерү өчен барысын да эшләргә омтылдылар. Безнең хөрмәтле «элекке гвардия» вәкилләренең төбәк файдасына иҗат-хезмәт иткән,  шундый да яшь, тормышны һәм кешеләрне ихлас яраткан чакларына кабат сәфәр кылу мөмкинлеге иде бу...<><><><><><>