Чирмешән районында бер хатын-кыз полиция хезмәткәрләренә һөҗүм иткән

Татарстанның Чирмешән районында полиция хезмәткәренә һөҗүм итүдә гаепләнүче 27 яшьлек хатын-кызны хөкем итәчәкләр. Бу хакта республика прокуратурасында хәбәр иттеләр.

17 гыйнвар төнендә исерек  хатын-кыз үзенең танышы йортының верандасында аңа металл шампур белән кизәнгән, шулай ук аны үтерү белән янаган. Ир-ат полиция хезмәткәрләрен чакырткан. Алар хатын-кызны тынычландырырга тырышып караганнар, исереклек дәрәҗәсен тикшерү өчен хастаханәгә барырга тәкъдим иткәннәр. Әмма ул хатын ике тапкыр полиция хезмәткәрләренең берсенең йөзенә, икенчесенең кулларына суккан. Хастаханәдә инде ул хокук сакчыларына карата  сүгенә һәм алты тапкыр аларга тибә.

«Үтерү белән янау», «хокук ияләренә  карата көч куллану» һәм «хакимият вәкилен сүгү» маддәләре буенча җинаять эше кузгатылды. Эш судка җибәрелгән.