Урыссуда Эчке эшләр министрлыгы бүлегенең эше буенча йомгаклау киңәшмәсе үтте

Полиция бүлеге начальнигы Марат Сибәгатов мәгълүматлары буенча, районда кайбер җинаятьләр төре үсешенә карамастан, җинаятьчелекнең гомуми дәрәҗәсе, тулаем республика белән чагыштырганда, кимегән. Гомумән алганда, бүлек эше уңай бәя алды. Район башлыгы Рөстәм Нуриев автоинспекция хезмәткәрләренә, төзекләндерү буенча предприятиегә, авыл җирлекләре башлыкларына, прокуратурага юл билгеләрен кую буенча үзара эш алып барган өчен аерым рәхмәт белдерде.

- Зур акча чыгымнары таләп итүенә карамастан, аларны кую безгә юлларда куркынычсызлык тәэмин итәргә мөмкинлек бирде, - дип ассызыклады ул. Нәтиҗәдә, узган елда бездә үлем белән тәмамланган бер генә авария дә булмады. Шул ук вакытта берничә ел гына элек безнең район территориясендә аварияләрдә һәлак булучылар саны уникегә җитә иде, - дип билгеләде район башлыгы.

Участок полицейскийларының, балигъ булмаган балалар белән эшләү комиссиясенең һәм башка хезмәтләрнең соңгы елларда аеруча нәтиҗәле башкарылган имин булмаган гаиләләр белән үзара уртак эше дә уңай яктан бәяләнде. Шуның белән бергә район башлыгы тынычланмаска һәм җинаятьләрне ачыклау буенча эшне дәвам итәргә, халык дружиналарын җәмәгать тәртибен саклауга активрак җәлеп итәргә киңәш итте. Утырышта шулай ук бүлекнең проблемалары да күтәрелде. Барыннан да элек бу - кадрлар, аеруча участок полицейскийларының җитмәве. Әлеге мәсьәлә - район җитәкчелегеннән һәм бүлектән беренче чиратта хәл итүне таләп иткән сорауларның берсе.