2026 елда Татарстанда урманнарны торгызуга финанслау күләме 1,5 тапкырга артачак.
2025 елда Татарстанда барлыгы 5335 гектар җирдә урманнар торгызылды һәм яңадан утыртылды.
Бу эшләрнең зур өлеше «Экологик иминлек» илкүләм проекты кысаларында гамәлгә ашырылган «Татарстан Республикасында урманнарны саклау» төбәк проекты ярдәмендә башкарылды. Бу хакта Татарстанның Урман хуҗалыгы министрлыгы хәбәр итә.
Төбәктә 2800 гектар мәйданда урманнарны яңарту эшләре үткәрелде, шуның 1600 гектары илкүләм проект хисабына башкарылды. Моннан тыш, башка категориягә кергән җирләрдә 2002 гектар мәйданда саклау урманнары утыртылды. Компенсацион урман торгызу һәм урман культураларын булдыру эшләре дә 533 гектарда башкарылды.
Министрлык җитәкчесе Равил Кузюров билгеләп үткәнчә, илкүләм проектның барлык күрсәткечләренә дә ирешелгән. Киселгән һәм зыян күргән урманнар мәйданына карата торгызылган урманнарның мәйданы нисбәте 150 процент тәшкил иткән, бу планлаштырылганнан шактый югары. Ел дәвамында урман булдыру өчен кирәкле төп агач төрләренең 12 тоннадан артык орлыгы җыелган.
Ул шулай ук урман питомникларының әһәмиятен ассызыклады. 2025 елда 51 урман питомнигында һәм Татарстанның Урман селекция-орлыкчылык үзәгендә 32,6 миллион төп үсентеләр, шул исәптән 27,5 миллион нарат агачы һәм 5,1 миллион яфраклы агач үстерелгән.
Ел нәтиҗәләре буенча, 2,5 гектар мәйдандагы урман культуралары урман фонды җирләренә рәсми рәвештә күчерелгән.
«2025 елда урман янгыннарының булмавы — зур уңыш. Бу нәтиҗәгә Урман хуҗалыгы, Эчке эшләр министрлыклары һәм муниципаль органнар хезмәткәрләренең бердәм тырышлыгы белән ирешелде», — дип өстәде ул.
2026 елда Татарстанның урман хуҗалыгы төбәк проектын гамәлгә ашыру өчен 160,8 миллион сум күләмендә финанслау алачак, бу 2025 ел белән чагыштырганда 44 процентка күбрәк. Бу акчалар урманнарны торгызу, урман үсемлекләре орлыкларын әзерләү, урман орлыкчылыгы объектларын карап тоту, шулай ук урман культуралары һәм урман янгыннарына каршы техникалар сатып алуга тотылачак.
Фото: © Султан Исхаков / «Татар-информ»
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев