«Бер генә кешенең үлеме дә — гаилә һәм ил өчен зур фаҗига»: Татарстан юлларындагы вәзгыять

Юл-транспорт һәлакәтләре саны кимесә дә, аларның нәтиҗәләре аянычлырак булып кала бирә. Республика юлларындагы вәзгыять, һәлакәткә китергән төп сәбәпләр һәм юл иминлеген арттыру чаралары хакында ТР Министрлар Кабинетында узган брифингта сөйләделәр.

Аварияләр азрак, һәлак булучылар күбрәк

8 февральгә булган мәгълүматлар буенча, Татарстан Республикасы территориясендә 228 юл-транспорт һәлакәте теркәлгән. Алар нәтиҗәсендә 40 кеше һәлак булган, якынча 300 кеше төрле дәрәҗәдәге тән җәрәхәтләре алган.
Татарстан Республикасы буенча Эчке эшләр министрлыгының Дәүләт автоинспекциясе идарәсе башлыгы Рөстәм Гарипов хәбәр иткәнчә, гыйнвар аенда гына да юлларда 29 кешенең гомере үзгән. Узган елның шул ук чоры белән чагыштырганда, аварияләр саны кимегән, әмма һәлак булучылар саны арткан.
Юл-транспорт һәлакәтләренең төп сәбәпләре булып һаман да каршы як полосага дөрес күчмәү, юл чатлыкларында чыгу тәртибен сакламау, шулай ук машина йөртүчеләрнең игътибарларын читкә юнәлтүе тора. Дәүләт автоинспекциясендә билгеләп үткәнчә, күп кенә очракларда йөртүчеләр автомобиль белән берьюлы идарә итә һәм шул ук вакытта телефоннарын куллана.

Аерым куркыныч тудыручы сәбәпләрнең берсе — каршы як хәрәкәт юлына чыгу. Бу гамәл юл хәрәкәтендә катнашучыларның барысы өчен дә зур хәвеф тудыра, аеруча каршы якка чыгу тыелган участокларда.
«Бер генә кешенең үлеме дә — гаилә һәм ил өчен зур фаҗига. Каршы як полосасына чыгу белән бәйле бер авариядә генә дә берьюлы берничә кеше һәлак булырга мөмкин», — дип ассызыклады Татарстанның баш дәүләт автоинспекторы.


Исерек хәлдә руль артына утыру — төзәтеп булмаслык хаталарга китерә

Гыйнвар аенда республикада исерек хәлдәге йөртүчеләр катнашында сигез юл-транспорт һәлакәте теркәлгән. Алар нәтиҗәсендә дүрт кеше һәлак булган, ун кеше төрле дәрәҗәдәге җәрәхәтләре алган.
Дәүләт автоинспекциясендә искәртүләренчә, алкоголь реакцияне акрынайта, үз-үзеңне контрольдә тотуны киметә. Исерек хәлдә руль артына утыруның иң авыр нәтиҗәсе — штраф та, җәза да түгел, ә кеше гомеренең үзгән.
Рөстәм Гарипов Казанда булган фаҗигале очракны мисал итеп китерде: бер әти кеше улының туган көнен билгели, исерек килеш руль артына утыра һәм шул ук көнне юл һәлакәтендә һәлак була.
2026 ел башыннан Татарстан юлларында 26 бала тән җәрәхәтләре алган. 2 февральдә Мамадыш районында Renault Logan автомобиле йөртүчесе идарәне югалта һәм йөк машинасына бәрелә — авария нәтиҗәсендә ике айлык сабый һәлак була.

Дәүләт автоинспекциясендә ассызыклаганча, балалар белән юлга чыгу — аеруча зур җаваплылык. Кар яву, бозлавык вакытында иң кечкенә хата да кеше гомере үзгән белән тәмамланырга мөмкин.

Фото: татар-Информ