Җәмгыять

Татарстан кунакханәләрен «Макс» платформасына тоташтыру киң колач ала

15 август 2026 - 09:56 Автор:

Лилия Михайлова

Татарстанда кунакханәләрне «Макс» цифрлы платформасына актив тоташтыру эше бара.

Бу юнәлештәге эшчәнлекне «Туризм һәм кунакчыллык» илкүләм проекты алга этәрә. Бу хакта Татарстан Республикасының Туристлык буенча дәүләт комитеты хәбәр итте.

«Макс» платформасы аша кунакханәгә урнашу бик җиңелләшә. Хәзер кунакларга теркәлү өстәлендә анкета тутырырга да, паспорт күрсәтергә дә кирәкми. Барлыгы кушымтада «Цифровой ID» бүлегенә кереп, кунакханә хезмәткәренә QR-код күрсәтү генә җитә. Бу мәгълүматларны Дәүләт хезмәтләре порталындагы хисап язмасыннан турыдан-туры ала. Шулай итеп, хезмәт күрсәтү тизләнә, ә мәгълүмат тутырганда хаталарның килеп чыгу ихтималы кими.

2026 елның 1 сентябреннән башлап, 50 һәм аннан да күбрәк номерлы барлык кунакханәләр өчен «Макс» аша урнашу мәҗбүри булачак. Бу көннән башлап, отельләр кунакларны паспорт яки башка шәхесне раслаучы документлар булмаганда да, илкүләм мессенджер аша бирелгән мәгълүматларны раслап, урнаштыра алачаклар.

Кунакханә хуҗаларына методик һәм техник ярдәм күрсәтелә, бу исә аларга яңа стандартка өзеклекләрсез һәм өстәмә чыгымнарсыз күчәргә булыша. Белгечләр җиһазларны көйләү, хезмәткәрләрне өйрәтү һәм системаны броньлауның эчке хезмәтләренә интеграцияләү кебек мәсьәләләрдә ярдәм итә.

Татарстанда «Макс» платформасына тоташтырылган кунакханәләр арасында «Ривьера», «РЕЛИТА-Казан», «Мillennium Рanorama», «Шифалы су – ижминводы» шифаханәсе, «Шишкинъ» комплексы, «Берсут» ял йорты, «Крокус-Отель» кебек объектлар бар.