Татарстанда 400дән артык оешма «Хезмәт җитештерүчәнлеге» проектында катнаша

Хәзерге вакытта республикада 405 оешма бу инициативага кушылган. Алар уртача алганда үзләренең җитештерүчәнлеген 35% арттыра алган, бу исә 20 миллион сум икътисади нәтиҗә китергән. 2030 елга кадәр проектка тагын 157 предприятие җәлеп ителәчәк, дип хәбәр итә Татарстанның Сәнәгать һәм сәүдә министрлыгы.

Проектның төп үзенчәлеге – Татарстан Региональ компетенцияләр үзәге белгечләренең сыйфатлы ярдәме. Алар әзер чишелешләр тәкъдим итмиләр, ә предприятие хезмәткәрләрен хезмәт җитештерүчәнлеген арттыру коралларына өйрәтәләр. Компаниянең эш төркеме белән бергә алар билгеләнгән участоктагы югалтуларны ачыклыйлар һәм лин-технологияләр кулланып, аларны эзлекле рәвештә бетерәләр.

Шунысы игътибарга лаек, бу процесс вакытында предприятие эшендә сизелерлек өзеклекләр булмый, чөнки белгечләр компания процессларына команда белән бергә кушылалар. Проект методологиясенең җитештерү процессларын ничек үзгәртә алуын күрсәтүче чын мисаллар бар. Мәсәлән, «ЗМТ‑ГРУПП» заводы еврокублар җитештерүне өч тапкырга арттырган.

«Расплав» предприятиесе, тутыкмый торган корычтан савыт-саба җитештерүче буларак, мантый пешерү савытлары җитештерүне оптимальләштергән, бу исә җитештерү күләмен 27% арттырган. Предприятиеләрнең проектта катнашу вакыты уртача 5-6 ай тәшкил итә. Төп күрсәткечләр сыйфатында процессның вакыты һәм җитештерү күләме кулланыла, бу үсеш резервларын объектив бәяләргә һәм нәтиҗәне теркәргә мөмкинлек бирә.

Проектка икътисадның чимал булмаган тармакларында эшләүче предприятиеләр дә кушыла ала: эшкәртү производствосы, авыл хуҗалыгы, төзелеш, транспорт һәм саклау, туризм, торак-коммуналь хуҗалык.

Моның өчен түбәндәге критерийларга туры килергә кирәк:

* Еллык керем – 400 миллион сумнан (НДСны исәпкә алмыйча);

туризм оешмалары өчен – 180 миллион сумнан.

* Устав капиталында чит ил инвесторлары өлеше 50% тан артмаска тиеш.

Гаризаны производительность.рф ИТ-платформасында тапшырырга мөмкин. 

https://tatar-inform.tatar/news/tatarstanda-kabat-yangyrlar-ham-kocle-il-kotela-5930430