Сөйләшүдә тыйнак, эчке халәтендә җыйнак

Бәйрәкәле Ринат Галиев Русия Кораллы Көчләре сафына үз теләге белән килгән, 2023 елның 12 сентябрендә РФ Оборона министрлыгы белән контракт төзегән. Көндәлек хәрби хезмәт, махсус операция биләмәсенә барырга этәргән сәбәпләр турында язма рәвештә хәбәрләшүдә бәянләде ул. Ринат Риф улы 1978 елның 3 октябрендә хезмәт сөючән Галиевлар гаиләсендә өлкән бала булып дөньяга килә. Урта мәктәпне тәмамлый. Яшьтән үк техника белән мавыга. Әтисе кебек үк, Тулада һава-десант гаскәрләрендә хезмәт итә. Техниканы яхшы белә, кызу урак чорында туган колхозында эшли. Фронтта исә Ринат бензовозда ягулык-майлау материаллары ташый. Бу бик җаваплы һәм хәвефле эш, чиктән тыш игътибарлык һәм кыюлык таләп итә.

Ринат сүзгә бик саран, шәхси кичерешләрен ярып салучылардан түгел. Бәлки яңа хәрби тәҗрибә тәэсиредер. Әңгәмә барышында үзе билгеләп үткәнчә, кичектергесез армия хезмәте чорында алган сугышчы күнекмәләре инде искергән. Хәзер барысы да башкача, һөҗүм тактикасы да икенче.

«Безнең заманда дроннар юк иде бит. Хәзер исә дроннар һәм авыр артиллерия сугышы. Дрон килүен алдан сиземләү, вакытында ышык урынга керү өчен бик яхшы ишетү сәләте кирәк», — ди Ринат Риф улы. Мәгълүм булганча, биредә ир-егетләр сөйләшүдә үтә тыйнак, әмма эчке халәтләре җыйнак, иң катлаулы хәлләрдә дә уяулык-ныклык күрсәтерлек.

Сугышчының әти -әнисе, Миләүшә һәм Риф Галиевлар исеменә уллары Ринат Галиевның хәрби әзерлекне саклауда күрсәткән уңышлары, хезмәттәге тырышлыгы өчен часть командирыннан Мактау кәгазе килеп ирешкән.

Гаиләләреннән аерылган һәм гадәти көндәлек уңайлыклардан мәхрүм ителгән сугышчыларга якыннары ярдәмен тою үтә мөһим, әлбәттә. Яугирнең Туймазы медицина көллиятендә укучы Русалина исемле сылу кызы бар. Бер елдан ул фельдшер булачак, бу һөнәр ияләренең ярдәме һәркайда кирәкле, мөһим. Әти кеше студент кызына матди ярдәм күрсәтә, моның өчен Русалина аңа бик рәхмәтле. Контрактны имзалаганчы, Галиев шактый гомер уйлана, үзе, кызы һәм туганнары, дуслары, гомумән Ил алдында җаваплылык хисе тоя. Шәхсән үзе билгеләп үткәнчә, яугирләр «Доброшвеи» волонтерлар отрядына күрсәткән гуманитар ярдәмнәре өчен ихлас рәхмәтле. Бүген безнең сугышчыларга матди генә түгел, рухи ярдәм дә таләп ителә. Шуңа күрә алар өчен өйдән килгән һәр хәбәр рухи бәйләнеш чыганагы булып тора, көч һәм ышаныч бирә, чыныктыра-илһамландыра.

— Ринат, син үз теләгең белән Ватанны яклаучылар рәтенә баскансың. Нәрсә этәрде соң сине бу хәлиткеч адымга?

— Туганнарымның һәм якыннарымның төрле фикердә булуына карамастан, мотлак Ватанны сакларга барырга кирәк, дигән нияткә килдем. Сәбәбе бик гади: егетләргә ярдәм итәргә теләдем…

Юлия Дәүләтбаева