Ютазы районы пенсионерлары велоярыштан җан рәхәте алды

Урыссу бистәсенең “Энергия” стадионына пенсионерлар, һава торышы уңай торуга һәм велосипедларда ярыш уздыру турында алдан игълан ителүгә карамастан, артык күп җыелмады. Пенсионерларны “Өченче яшь” республика ярышлары кысасында оештырылган велоярыш белән район яшьләр эшләре, спорт һәм туризм бүлеге начальнигы Регина Галләмова тәбрик итте. Район ветераннар советы рәисе Зоя Глушкова җиңел трасса һәм матур җиңүләр теләде.

Чыннан да, пенсионерлар Людмила Аккуратнова һәм Вячеслав Сибагатов артыннан күзләр иярмәде. Алар ярыш шартлары буенча каралган ике түгәрәкне санаулы минут эчендә уздылар һәм беренче урынга лаек булдылар. Икенче урынга чыккан мәгариф бүлеге ветераны Рима Муллагалиева исә үзенең ике көпчәкле транспортында җан рәхәте өчен алу ярышка чыкты. Алар Виктор Зуборев белән икенче урынны бүлеште. Җиңүчеләр истәлекле бүләкләр белән билгеләнде.