Дөнья өчен дә, ахирәт өчен дә иҗтиһат кылып

Мәчетнең имам хатибы Ильяс хәзрәт Зиннәтуллин, чараны ачып, барысын да бәйрәм белән котлады, мөселманнарның тотылган уразаларының әҗер-савапларын күрүләрен теләде.

Аннан соң сүз алган район хакимияте вәкиле Сәгадәтулла Төхбәтуллин да мәхәллә мөселманнарын гает белән тәбрикләде, зур сынауны үтә алган мөселманнарга аерым рәхмәт белдерде. Бистәбездә ике мәчет, мәдрәсә эшләвенең бик зур сөенеч булуын билгеләп үтте, барлык район халкына исәнлек-саулык теләде.

Аннан соң вәгазь белән сүз алган Ильяс хәзрәт бик үтемле чыгыш тотты. Ул үзенең вәгазендә Аллаһы Тәгалә безгә нәфесне тыю өчен гакыл биргәнлеген, шуңа күрә аны өстен куеп, безгә ураза тоту фарыз кылынуын билгеләп үтте. Ураза аша күп күркәм сыйфатлар тәрбиялибез. Бу көннәрдә, аңлаган кешегә, Раббыбызның үзе тарафыннан ярдәм була. Сабырлык, түземлелек өчен әҗер-саваплар күп бирелә, кеше уңышка ирешә. Ураза чорында ифтар ашлары, хәер-сәдакалар төрендә күп юмартлыклар кылына, Коръән, тәравих намазлары укыла. Бу дөнья өчен дә, ахирәт өчен дә тырышлык кылу фарыз.

Аннары барлык мөселманнар гает намазына басты, хөтбә укылды.

Соңыннан имам-хатип барысын да сый-нигъмәтләр тулы чәй өстәле артына чакырды. Балалар аерым бүләкләр белән, шулай ук мөселманнар да зур булмаган бүләкләр тапшырылып озатылды.